EDITORYAL - Adik nga kawani sa gobiyerno

Duna na say mga empleyado sa Lapu-Lapu City Hall ang nasakpang tiggamitan og ilegal nga drugas human sa gihimong supresang drug test nga gihimo sa City of Lapu-Lapu Office of Substance Abuse Prevention (CLOSAP) dili palang dugay.

Matud pa sa report, 16 sa 77 ka mga kawani sa ihawan, sa hospital sa siyudad ug sa barangay Ibo sa maong siyudad nga gipaubos sa maong drug test ang nasuta nga positibo sila sa paggamit og ilegal nga drugas. Dili lang kini maoy unang higayon sa Lapu-Lapu City nga nasakpang nigamit og ilegal nga drugas. Dili lang sab ang maong siyudad ang dunay sama niini nga problema.

Subo kaayo palandungon nga kaning mga tawhana mawagtangan og trabaho tungod sa ilang bisyo. Sayod na silang daan nga gidili kini sa balaod ug siguradong nakahibalo sila kun unsay mahitabo kanila kun sila masakpan sama sa nahitabo nila karon.

Dili lang sila maoy maapektohan sa ilang gidangatan, hasta sa maamong ang ilang mga pamilya nga nagsalig sa ilang sweldo gikan sa ilang trabaho. Ang mga local government units sama sa Lapu-Lapu City wala nagpasagad sa kampanya batok ilegal nga drugas ug kaning mga surepresang drug test regular nila gihimo aron pagsiguro nga walay durugistang nagtrabaho sa gobiyerno.

Nakita na sa tanan kun unsa kadako ang negatibong epekto sa ilegal nga drugas, daghang mga kinabuhi ang naguba hasta mga pamilya naamong tungod sa bisyo.

Makatarunganon lang nga ipadayon kining drug test, bisan og duna pay masuko nga kawaning maoy masakpan tungod kay para kini sa kaayohan dili lang sa gobiyerno kondili para kanila ug sa ilang mga pamilyang nagsalig kanila.