EDITORYAL - Mga gwardiyang “kolurom”

Kaning mga nahitabong pagpanulis sa mga establisamento dinhi sa Sugbu makapahinuklog kun gamit ba gyud kining mga gwardiya ug kun duna ba gyud silay maayong relasyon ngadto sa lokal nga kapolisan.

Ang tubag niini, magdepende kun unsa kadako ilang sweldo, depende sa ilang pamarog ug pagdala sa ilang uniporme, depende sa kalidad sa ilang training ug armas nga giisyu aron dad-on sa pagbantay diha sa ilang trabaho.

Kadtong mga gwardiya nga sakto og training, nakahibalo gyud sa ilang trabaho ug responsibilidad, mao sab kini rason nganong mas dagko sila og sweldo ug benepisyo itandi sa uban. Kay ang ilang skills ug trainings gihatagan og importansiya sa ilang security agencies.

Apan daghang mga security agencies ang wala motuman sa Labor Code, duna silay mga gwardiyang “bukot-bukot” nga walay mga lisensiya apan gi-deploy ug gipabantay. Mao nga dunay uban lago kaayo og uniporme, walay armas, walay kaligo, wala gani pamarbas ang uban ug duna pay uban gipangduka sa ilang pwesto kay walay relibo-relibo. Kay kung dili ang tindahan ang nagtinihik, ang ilang security agency maoy walay ikapuli o utro pud nga bukot-bukot. Subo kaayo nga dunay mga tindahan nga mokuha og mga security agency nga susama niini.

Usa ka desente ug halangdon ang trabaho sa gwardiya, mas maayo pa gani kini nungka sa mangawat o manulis o malambigit sa mga krimen.

Apan ang pagka-gwardiya dili lang kutob sa pagsul-ob og blue guard uniforms, kinahanglan gyud nga nag-agi sila og saktong training sa maayong security, investigative, detective nga mga eskuylahan.

Kinahanglan nga duna silay lisensiya isip gwardiya, kinahanglang kompleto sila sa gun proficiency training ug mga dokumento sa paghupot og armas nga gamiton sa ilang pagbantay.

Swerte nalang ang uban nga nakatunong og security agencies nga husto og sweldo ug dunay mga benepisyo. Ang uban, wala gyuy klarong mga benepisyo ug gamay pa gyud ang sweldo wa say overtime pay.

Kung ingon ini ang klase sa mga gwardiya, makasiguro kaha ang mga establisamento sa ilang seguridad?

Nga ang uban kay “kolurom” di na motawag og polis bisan duna nay krimeng nahitabo sa ilang tugkaran kay mahadlok mahibaw-ang wala silay lisensiya?

Maayo tingaling subayon tagsa-tagsa sa mga hingtungdang ahensiya kining mga gwardiya sa mga establisamento.