Ay'g idahig sa politika

Nitingog nang Local Water Utilities Administration (LWUA) ug hinaut irespito ni Mayor Michael Rama ang opinyon sa ahensiya aron malikayan nga mabalda ang nagpadayong mga programa sa water district.

Klaro ang tubag sa LWUA sa suwat sa dakbayan sa Sugbo nga nangayo og sertipikasyon nga wa ni pagsupak pagtudlo ni Rama og bag-ong mga sakop sa MCWD board, bisan wala pa mahuman ang termino sa mga direktor nga buot niyang hulipan, way gahom ang mayor paghimo niini.

Samtang duna siyay gahom pagtudlo sa mamahimong sakop sa MCWD board apan sigun sa LWUA dili kabahin sa maong awtoridad ang pagtangtang.

Of course, mahimong kwestiyonon ni Rama ang opinyon sa LWUA didto sa korte.

Pero alang nako mas maayong huwaton nalang sa mayor nga mahuman ang termino nilang chairman Joey Daluz, Miguelito Pato ug Jodelyn Seno.

Klaro nga si Daluz ray target ni Rama ug naangin lang sila si Pato ug Seno. Ug di sab ikalimod nga politika ang dakong hinungdan nganong naghigwaos si Rama nga matangtang si Daluz gikan sa MCWD.

Wala malilong sa mga tigpaniid sa politika sa Sugbo nga si Daluz usa sa mga gihugon-hugon nga moatbang ni Rama sa 2025 elections.

Ug di makabuylo si Rama sa gusto niyang buhaton diha sa MCWD samtang anaa si Daluz nga posibling mahimo niyang kaatbang.

Di makaayo sa publiko kun idahig sa politika ang MCWD. Ug tataw ni sa mga lakang nga buot buhaton sa bag-ong mga tinudlo ni Rama nga silang Nelson Yuvallos, Aristotle Batuhan ug Melquiades Feliciano.

Sigun ni Feliciano nga buot nilang ireview ang tanang mga proyekyo nga gisudlan sa MCWD nga sa ato pa posibling malangan ang pagpatuman sa mga nag-ong-ong nga proyekto ug maapektohan ang mga nagpadayon na sa pagkakaron.

Kun dunay nakitang iregularidad ang mayor sa pagpadagan ni Daluz ug mga kauban sa MCWD, ang unang angayan niyang buhaton mao ang pagpasaka og kaso.