Ang asno ug si San Antonio de Padua

Niadtong gamay pa ko, ang akong apohan nga si Anhing Lola Delfina ang kada Martes magsul-ob to og brown nga sinina nga dunay bakus (chord).

Dili ko kalimot hapon kadto paingon mi sa palengke kay didto man gud ko nagdako niya ug sa akong Lolo Tinong.

May gamay siyang gihatag nakong imahen nga dunay balay balay (plastic nga sudlanan).

Si San Antonio de Padua diay kadto kay kadto siya deboto man ni San Antonio de Padua. Mao tingali ning hinungdan kun nganong hangtud karon duna gihapon koy pagtamud ning maong Santos.

Kanhi Agostino nga nahimong sakop sa kahugpungan sa Order of Friar Minors nga tinukod ni San Francisco de Asissi.

Adunay mga sugilanon nga nalambigit sa kinabuhi ni San Antonio. Usa niini kadtong aroganteng datu nga walay pagtuo sa Real Presence sa Ginoo diha sa Sagrada Eyukaristiya.

Gihagit niya si San Antonio sa iyang pag-ingon: “Motuo ko anang imong giingong Ginoo nianang pan kun ang akong asno moluhod sa atubangan niana!”

Gidawat ni San Antonio ang maong hagit. Sulod sa tulo ka adlaw siya nag-ampo, nagpuasa.

Samtang sa laing bahin, ang adunahan wala mohatag og pagkaon sa iyang asno sulod pud sa tulo ka mga adlaw. sa dihang niabot na ang tukmang panahon, nag-abot ang masigkahabig.

Giandam ni San Antonio ang konsgardong hostiyas sulod sa monstrance ang datu usab ang nipakaon sa iyang gutom na kaayo nga asno.

Apan unsang pagkaunsaa sa dihang nakakita ang asno kang San Antonio nga nagdala sa Santisimo Sakramento, niluhod kini atubangan sa Santisimo. Timailhan kini nga bisan ang hayop nipatuo sa kahalangdon sa maong panagtagbo.

Kining maong panagtagbo nagpahinumdom kanato nga bisan asa anaa ang Dios. Ang atong gikalawat matag misa dili lang ordinaryo nga pan. Hinunoa lawas kini sa atong Ginoo ug ang bino Dugo ni Kristo nga iyang giula alang kanato. Amen!