Motor ipadaplin

Ang tanang motorsiklo nga moagi sa South Coastal Road sa SRP lahus na ngadto Serging Osmeña Avenue sa utlanan sa Cebu City ug Mandaue, anha na paagion sa kinadaplinan dapit sa tuo.

Gikauyonan sa mga sakop sa Cebu City Traffic Management Board nga ipatuman ni sa pamasin nga malikayan ang dugang aksidente nga may maligsan na sab nga magmotor diha sa South Coastal Road.

Nabantayan man gud namo nga daghang magmotor nga moagi sa SRP, mosuksok gyud pagpadagan taliwala sa kusog nga nagdagan nga mga dagkong sakyanan, mao nga dunay uban kanila naligsan.

Kon masugdan na kini pagpatuman, dunay mga patrol vehicles ang kapolisan ug mga traffic enforcers nga magpatrolya ug panakpon ang mga dili motuman sa balaod.

* * *

Nahisgotan man diay sa national TV station ang kahimtang sa panubig dinhi sa Cebu City, ug ubang bahin sa Metro Cebu.

Giangkon sa kadagkoan sa MCWD nga daghan pa sa mga lumolupyo dinhi sa Cebu City nga wa pa makapahimu’s sa ilang serbisyo.

Apan arang-arang na lang karon kay samtang nagkanihit ang suplay sa tubig sa Jaclupan dam sa Talisay, ug sa Buhisan dam sa Barangay Buhisan, Cebu City, dunay laing kakuhaan og tubig ang MCWD.

Ang usa sa labing dako nga kakuhaan og tubig sa MCWD mao ang gihimo nga dam sa Barangay Lusaran nga proyekto sa JE Hydro Bio-Energy Corporation nga gipanag-iya ni Engr. Joffrey Hapitan.

Gi-process sa JE Hydro ang tubig gikan sa sapa aron mahimong limpyo ug pwede na mainom sa mga tawo, dayon ibuga kini dinhi sa siyudad subay sa dagkong mga tubo.

Barato ra ang baligya sa JE Hydro sa ilang tubig ngadto sa MCWD, ug mahal pa gani ang prisyo sa desalinated water nga gikan sa dagat ug gipatab-ang lang sa laing kompaniya.

Apan, matud pa sa uban, bahala na og mahal ang prisyo sa tubig kay mag-unsa man ang kwarta, kon wa kay tubig nga magamit.

* * *     

Nasakpan sa Department of Justice nga ang suspendido nga kongresista sa Negros Oriental, Arnolfo “Arnie” Teves nagpakiluoy nga hayatagan siya’g “asylum” sa gamay kaayong nasud sa Timor-Leste.

Ambot og hatagan ba kaha siya og asylum sa mga opisyal sa Timor-Leste. Matud ni Justice Secretary Jesus Crispin Remulla nga mangita gyud sila’g paagi nga makuha nila si Teves.

Paita no? Kwartahan tuod si Teves pero ang nahitabo kaniya karon nga nagtago-tago na, mas maayo pa ang usa ka pobre apan gawasnon ug maayo’g kinatulgan.