Dunay limitasyon

Isip ikaduhang ginikanan ang mga magtutudlo dunay katungod pagdisiplina sa ilang ilang mga estudyante sa paagi nga husto ug nasubay sa balaod. Ang pagpangasaba sa usa ka magtutudlo ngadto sa iyang mga tinun-an kun gikinahanglan aron pagdisiplina kabahin sa ilang responsibilidad.

Apan dunay limitasyon ang paghimo niini. Ang mga butang nga yano ra nga mabuhat sa mga maestro ug maestra sa kanhiay’ng panahon dili na mahimo karon tungod sa balaod nga nagprotehir sa interest sa mga minor de edad.

Wala sab hinuon ni magpasabot nga pasagdan ug dili nalang badlongon sa mga magtutudlo ang sayop sa ilang mga estudyante.

Ako ni nga gihisgutan tungod sa nag-viral nga video sa usa ka magtutudlo sa Tisa National High School dinhi sa dakbayan sa Sugbo diin iyang gitawag ang atensiyon sa duha niya ka mga estudyante nga iyang gidudahang nagkinopyahay sa pasulit.

Wala masayop ang maestra sa iyang pagduda, gani niangkon man ang usa sa duha ka tinun-an nga nangopya ang iyang classmate niya.

Tingali dili tumong sa maestra nga makauwawan ang duha niya ka mga tinun-an atubangan sa klase.

Apan ang iyang gihimo nga pag-post sa video diha sa social media dili angayang pasayloon sa mga opisyal sa Department of Education. 

Tinuod dili husto ang gihimo sa duha niya ka mga tinun-an apan wala ni maghatag og katungod ni bisan kinsa aron pakauwawan ang mga estudyante.

Ang angayang gihimo sa maestra mao ang sekreto nga pagpatawag sa duha human sa klase og gisukmatan sa ilang sayop nga gihimo.

Kini maoy buhaton sa usa ka desente ug edukado nga tawo ug dili kay pakauwawan ang mga tinun-an.

Tingali nagtuo si ma’am nga pinaagi sa iyang gihimo makakuha siya og daghang follower sa Tiktok. Panahon na tingali nga mohimo og lagda ang DepEd mahitungod sa paggamit sa mga maestra ug maestro sa social media.

Dili hinuon tanan nga mga maestra nga aktibo sa social media ang nagpabadlong.

Dunay daghan nga dalaygon ang gihimo ug nakatabang dili lang sa ilang mga estudyante kun dili sa mga tinun-an nga nagsunod sa ilang social media page.