Kugi maoy labing epektibong palihi

Way bisan usa nga nasayod unsay nagpaabot sa ugma, apan tanan naglaum nga mas hamugaway ang bag-ong tuig itandi sa tuig nga milabay.

Uban ang pangindahay nga mas magmalamboon ang ilang kinabuhi niining bag-ong tuig, daghan sa mga Pilipino ang mituo sa palihi—maningkamot gyud kutob sa mahimo nga dunay 13 ka klase sa lingin nga prutas diha sa lamesa atol sa bag-ong tuig.

Bisan hilaw ug dili pa makaon mopugos og palit ang uban bisan klarong gipahimuslan sa mga negosyante kay lagi palihi ug kinahanglang swertehon sa bag-ong tuig.

Ang ubang palihi naglakip sa pagsul-on og dotted nga sinina ug ang pagpakagay og sinsiyo diha sa bulsa inig hagtok gyud sa tungang gabii sa Disyembre 31.

Kun usa ka sa mga mituo niining maong mga palihi, kumusta ang imong kinabuhi? Epektibo ba ang palihi?

Daghan ko og kaila nga kadatuig gyud magpalihi. Apan kun imong pangutan-on kumusta ang ilang panginabuhi moingon nga mao lang gihapon ug way kausaban.

Ang uban moingon nga mas naglisod pa gani, nga sa ato pa way epekto ang ilang palihi.

Way mas labaw ka epektibo nga palihi sa kakugi ug paningkamot aron molambo ang imong kinabuhi inay nga magsalig sa swerte.

Ang tanang malampuson nga tawo sa kalibutan wala magsalig sa swerte kun dili sa ilang paningkamot ug kakugi. Singot ug dugo ang ilang puhonan aron makab-ot ang kaharuhay.

* * *

Taliwa sa kabug-at nga gipas-an sa publiko nunot sa epekto sa pandemya ug sa pagsulbong sa presyo sa mga palaliton, dugang pas-anonon sa mga magbubuhis sa dakbayan sa Sugbo ang nagpaabot niining tuig 2023.

Kini human giaprobahan sa konseho sa dakbayan niadtong Biyernes, atol sa usa ka special session, ang amendment sa tax ordinance niini diin nagtugot sa pagpaumento sa bayranan sa buhis alang sa mga real properties—yuta, balay ug makenarya.

Bisan dili ibulto sa dakbayan og patuman ang bag-ong schedule of market values apan tungod kay 20 ka tuig silang wala kapatuman og umento sa real property taxes, sakit-sakit gihapon ang epekto niini labi pa ngadto sa mga kabus nga mga tag-iya og panimay ug yuta.

Hinaot lang nga ang dugang buhis nga makolekta tarungon og gasto sa mga opisyal sa dakbayan alang sa benepisyo sa mga magbubuhis ug dili iwaldas.