Mga intrigador

Duna gyuy mga tawo nga kusog kaayong mangintriga aron nga magkaaway ang mga suod nga opisyal sa kagamhanan.

May gipalakaw na usab nga mga tabi-tabi diha sa Mandaue City nga si Kongresista Lolypop Ouano-Dizon nagtinguha kuno nga molansar pagka mayor.

Ang tumong sa mga intrigador aron nga maguba ang maayong relasyon nila ni Mayor Jonas Cortes ug ni Kongresista Lolypop nga pagka karon pwerteng suora.

Gikuhaan man gud nako og reaksyon niini si Jojo Dizon, ang bana ni Lolypop, ug nahibaw-an nako nga dili gyud tinuod ang maong gipalakaw nga tabi-tabi.

Sila si Mayor Jonas ug Lolypop kaalyado sa miaging eleksyon ug tungod sa ilang panag-alyado, giharos nila ang kadaogan, apan luyo diay sa ilang kadaogan dunay nagtiyabaw.

Tambag nako ni Mayor Jonas, ayaw pagtoo sa maong mga intriga ug padayon sa imong mga maayong serbisyo sa katawhan.

Matud ni Jojo Dizon nga si Lolypop “enjoy” kaayo sa iyang pagka kongresista, ug nganong mangandoy pa man kini nga mahimong mayor?

* * *

Gihingusgan na karon sa Cebu City Transportation Office (CCTO) ang pagbadlong sa mga opisyal ug kawani sa mga barangay nga moparking sa karsada atubangan sa ilang mga barangay.

Tungod niini, ang mga opisyal sa Barangay Labangon ug Tisa nangayo og pagtugot sa Cebu City Traffic Management Board nga dili sila apilon sa paghimo’g kampanya sa CCTO.

Atol sa among tigum sa Traffic Board, nahukman namo nga balibaran ang hangyo sa mga opisyal sa Labangon ug Tisa.

Nganong gibalibaran man namo? Gipasabot nako ang akong mga kauban nga kon hatagan nato og pabor ang Labangon ug Tisa, mosunod niini ang ubang barangay.

Daghang barangay nga ang ilang mga sakyanan anha ra iparada sa karsada atubangan sa ilang barangay hall. Wa sila’y kaikog nga sa ilang gihimo makahasol sila sa mga motorista.

Usa niini mao ang Barangay Santo Nino nga anaa ra sa Legaspi Street nagparking sa ilang sakyanan, bombero, mga dump truck.

Ang Barangay Santo Nino usa sa mga kwartahan nga barangay ug takus kaayo sila nga mangita og parking area sa ilang mga sakyanan, apan wa gyud nila kini himoa.

Gani, si Mayor Michael Rama mimando gyud ni CCTO head Raquel Arce nga dili tugotan ang kapolisan sa Abellana Police Station nga migamit sa karsada kilid sa ilang opisina nga parkinganan sa mga sakyanan.

Unta, makasabot ang mga opisyal sa kabarangayan nga kami sa Traffic Board, nangita lang og paagi nga mapahapsay ang trapiko ug mohangyo mi ninyo og suporta.