Impact sa krisis

Wala ug tuo ang kritisismo nga nadawat sa kagamhanan kalabot niining padayong pagtiurok sa kantidad sa peso batok sa Amerikanhong dolyar sa currency exchange rate. Matud sa uban timailhan kuno kini sa palpak nga pamalakad sa kasamtangang administrasyon.

Sa akong pagsulat niining akong kolum kagahapon, naglawig sa P59.01 ang matag US dollar. Kini sa pagsirado sa foreign exchange market kaniadtong Sabado sa kadlawon sa Pilipinas. Ug usa ka tikang na lamang ug moabot na sa P60 ang matag dolyar.

Of course, tungod niining maong sitwasyon, mayoridad  kanato ang mosing-al nga nagsugod na og kaliring ang atong ekonomiya ug nga mas  dakong krisis ang atong masinati sa umaabot nga mga adlaw. Gani, matag tudlo nagpunting ug nagbasol karon sa bag-ong liderato.

Hinuon, di nato ikalimod nga ania kita nag-atubang karon sa dakong krisis sa ekonomiya. Gani, sukad pa sa niaging tuig, nagsige na og saka ang presyo sa mga nag-unang palaliton sa nasud. Apan dili lamang ang Pilipinas ang nakasinati og susama niini nga kahimtang.

Kon atong utingkayon pag-ayo, global ang scope niining economic crisis karon. Kini gumikan sa seryosong epekto sa nagkadaiyang problema sa kalibotan, nag-una niini ang pagratsada sa coronavirus disease nga mipatay ug milyones ug mipalukapa sa ekonomiya sa halos tanang nasud.

Kini pun-an pa sa walay hunong nga pagsaka sa presyo sa gasolina sa kalibotanong merkado mugna sa nagkahinay nga sirkulasyon sa lana gumikan sa padayong gubat tali sa Russia ug Ukraine nga gikahadlokang maoy sinugdanan sa World War III.

Ang Pilipinas wala pasayloa niining maong krisis. Mao nang bisan kinsa pa ang namuno karon - bisan pa kon si Leni Robredo o si Ping Lacson o si Manny Pacquiao - dili gayud ang Pilipinas makaeskapo gikan niining dakong problema sa ekonomiya.

Ambot kong unsay solusyon sa kagamhanan niining atong krisis sa ekonomiya karon. Apan hinaut nga wala magkulang ang mga economic adviser ni Presidente Ferdinand Marcos Jr. paghunghong kaniya og mga ideya nga makasangga sa impact niining maong krisis.