O Padre Oscar

Samtang niadto ko sa Ayala aron makigkita kang Atty. Evelyn, akong gikahibalag si Julie ug ang iyang mga kaubanan. Nahinumdom nuon ko ni Padre Oscar Camomot. Pag-umangkon ni Bishop Teofilo Camomot. Personal ang akong kasinatian ni Padre Oscar.

Niadtong nagtungha pa ko sa seminary siya ang tawo nga nagtudlo Kanako sa bili sa pagkamanggihatagon.

Ang iyang pagkamanggihatagon labina sa mga libro makatandog gyud kaayo. Hangtud karon anaa pa nako ang mga libro nga iyang gihatag kay ako untang giutang apan sayod siya nga ako dili makabayad mao nga iya na lang gihatag. Sa laing bahin siya kadtong nagtudlo kanako sa pagkamanggihatagon sa panahon. Canta Misa nako kaniadto sa dihang niduaw siya Kanako ug nitambong gyud niini.

Maestro siya sa prophetic literature ug hanas siya kun maghisgot kita sa liberation theology.

Bisan pa man kun daw welga ang iyang wali apan sayud ko nga usa lamang ang iyang tuyo nga unta mahuptan ang gipangandoy nga kausaban.

Kausaban nga gikinahanglan sa tanan. Kausaban nga makatabang sa kadaghanan.

Tig-a siya og kasingkasing mao ning akong panlantaw apan sa kaulahian sa dayon na niyang kabugto kadtong nagmasakiton na ang akong idolo maantigo man pud diay siya nga mohilak ug magmahay gumikan sa iyang nabuhat ngadto sa iyang iyang uyoan ang Venerable Teofilo Camomot.

Sa dayon na nakong kapari siya kadtong nitugyan Kanako sa kalis sa iyang uyoan nga si Padre Norbing Llanos ug hangtud karon ang maong kalis ako gihapong gigamit.

Nanumbalik ang akong handumanan ning par inga nahimong deviant sa mga mata sa ubang mga kaparian. Ang iyang pagkamatinabangon dako naman kaayo kahimoan aron ako madasig sa pagpadayon sa bisan unsang ideolohiya pinasikad sa kawsa ug pagtulon-an ni Kristo.

Salamat kaayo Padre Oscar dili nako kalimtan ang imong pastoral nga kakugi.

Dili man tuod ka hingpit apan sa Dios ikaw nisangpit. Mga pulong man tuod nimo sakit apan akong kinabuhi hangtud karon imong nadasig. O Padre Oscar!