EDITORYAL - Pagbuhi sa Freedom Park

Dunay komosyon nga nahitabo sa clearing operation nga gihimo diha sa Calderon St. sa Carbon Public Market sa Brgy. Ermita sa Dakbayan sa Sugbu niadtong nakalabay nga adlaw nga Lunes.

Kagahapon malampuson sab ang siyudad  pinaagi sa Market Operations Division sa clearing diha sa Freedom Park. Ang sikat nga palitanan og mga handy craft ug mga preskong buwak sa maong merkado.

Kanang dapita napuno na og mga ambulant vendors nga magdala lang kaniadto og palanggana, buyot, bukag nga butangan sa ilang mga paninda ilabi na ang mga buwak. Kadugayan ang mga bukag, buyot, lamesita gibutangan na og atop, hangtud nagkadaghan na og maayo ang mga naninda ug wala na kapugngi pa sa mga nangaging mga administrasyon sa Siyudad sa Sugbu ang hinayhinay nga pagkalumos sa Freedom Park.

Nawala na ang pisikal nga dagway sa Freedom Park kay napulihan og mga stalls, lapokon nga bahin diha sa sulod, mga tindahan ug uban pa.

Gani dunay mga police operations kaniadto nga gilusad diha sa maong lugar tungod sa patago-tago nga operasyon sa videokarera sa mga ngilit nga bahin sa mga stalls sa sulod.

Karon nga gihawan na kini, mahatagan og hustisya ang bansag sa dapit nga “Freedom Park” kay mabalik na unya ang kaanindot sa lugar sa karaang panahon. Parke sa Kagawasan nila pa.

Tinuod daghang wala makauyon niini, apan wala man gyuy mga kausaban nga siyento-porsiyentong uyon ang mga apektado.

Subo lang nga mura og wala sila sukad mag-abot  sa mga otoridad sa siyudad. Kini bisan pa og pila na ka tuig gihisgutan ang modernisasyon sa Carbon Market.

Kun ang mga vendors nga supak sa kausaban maoy pangutan-on moingon man gyud sila nga walay klaro ang sabot-sabot ug wala sila pahibaw-a.

Apan kun ang Market Operations Division maoy pangutan-on, hagbay rang napadad-an og notisya ug napasabot ang mga maapektahang vendors.

Gani makadaghang higayon nga giuktaba ang clearing operation tungod sa pandemiya, sa Odette ug ning bag-o sa eleksyon.

Kining tanan nahitabo sud sa kapin duha ka tuig, syaro wala gyud mag-abot ang duha ka habig aron magklarohay sa plano? O dunay usa kanila ang namakak?