Advance rent ug deposits sa apartment

Dear Atty. Divine,

Naa koy gitan-aw karon nga apartment og plano kini nako nga abangan. Nag-estorya na mi sa owner og usa sa iyang kondisyon sa dili pa mo move-in sa iyang apartment nga mobayad ko og 1-month nga advance rent nga mobalor og P10,000.00 ug 2-months nga deposit nga mobalor P20,000.00 og ang total niini moabot og P30,000.00. Mosugod sab daw ko og bayad niya og P10,000.00 nga abang next month. Ang akong pangutana kun naa bay legal basis ning kolektahon sa owner nako nga 1-month advance ug 2-months deposits? Daghang Salamat. — Eva

* * *

Dear Eva,

Basi sa Section 7 sa Republic Act 9653 or an Act Establishing Reforms In The Regulation of Rent of Certain Residential Units, Providing The Mechanisms Therefor and For Other Purposes, kini nagkanayon nga ang lessor mamahimong maka-demand og advance rent apan kinahanglan nga dili kini mosobra sa 1 month ug ang deposit nga mamahimo niyang kolektahon kinahanglan sab nga dili mosobra sa 2 months. Ang deposit mamahimo kana nimong makuha pagbalik ini’g tapos sa imong kontrata apan mao sab kini kuhaan kun ugaling aduna kay mga unpaid bills or rent or kun dunay mga damages sa sud sa apartment ug ang sobra niini ibalik ra kanimo. Busa sa imong pangutana kun aduna bay legal basis kining pagpangayo og advance rent ug deposit sa lessor nganha kanimo, ang tubag niini, yes, kay mao kanay nalatid sa Republic Act 9653. Thank you and God Bless.

Atty. Divine

Alang sa inyong pangutana, palihug lang sa pag-email sa [email protected] og akong tubagon ang inyong pangutana pinaagi sa akong column matag Miyerkules, Sabado ug Domingo.