EDITORYAL - Hustisya alang sa local producers
Makapahiubos sa dughan sa katawhang Pilipino ilabi na kadtong mga nisakripisyo aron tabangan ang gobiyerno pagsagubang sa problema sa supply sa mga personal protective equipment (PPE), face mask ug face shields taliwala ning pandemiya sa COVID-19.
Ang gobiyerno nanawagan sa mga pabrika nga mo-shift una pagprodyus og mga facemask, face shields ug PPEs.
Tuod man, dunay mga kompanyang dili essential ang produkto ang mi-invest aron paghimo og facemask, face shields, ug PPEs aron makasugakod ug dili hingpit manirado.
Apan unsa mang pagkaunsaha nga sa gihimong imbestigasyon sa Senado, nigawas man nga mas gipaboran sa gobiyerno ang mga facemask, faceshields, ug PPEs nga made in China.
Bahala'g kinsa pa na ang local business firms nga nag-import niini gikan sa China, ang sakit mao nga dunay mga Pilipinong kompanya nga nipakita og patriyotismo ug pagmahal sa nasud nga misakripisyo aron tabangan ang gobiyerno. Apan karon nangaalkanse.
Sa Senate hearing, ang usa sa mga lokal producers miingon miabot pa sa punto nga "hangyo-lobo" na ang presyong gipangayo sa gobiyerno aron kuno moparang sa pinakaubos nga presyo sa uban.
Bisan wala nila nganli, ang gipasabot mao ang mga gikan sa China.
Gani kung tan-awon karon sa mga tindahan ug malls, walay makit-ang baligyang dili ginama sa China.
Kini tungod kay duna man silay kapabilidad ug kapasidad pagprodyus og daghan itandi sa lokal nga mga pabrika. Maong mabaligya ra nila og barato.
Hain man ang hustisya niana? Hain naman ang gitawag og buy local? Bisan unsaon og tan-aw ug kwenta dili gyud makatarunganon ang nahitabo sa mga local producers.
Unta timan-an ug dili kini kalimtan sa katawhang Pilipino.
- Latest