Mao pay magbuot

Dili garantiya nga ang hingkod nga panuigon alang sa mas hamtong nga hunahuna ug pagbati.

Dunay uban nga hamtong na tuod apan wala lang gihapoy buot. Bisan gani ang lawas dili garantiya nga ang usa ka tawo sakto na og kabuot.

Ang uban ganing daw mga wala man gihapoy hustong kabuot.

Labaw na nga ang kadako sa ulo dili garantiya nga mabuot ug may hustong panghunahuna.

Daghang mga tawo nga sama kanila daw mga bata nga patagad ra kaayo.

Ang maong pagpatagad tingali bunga sa dakong panginahanglan nga mahatagan siya og bili ug buot niyang imantala ang iyang presensiya bisan pa man kun annoying na kaayo.

Mao ni makadaut. Asa pa hinuon kining mga tinabangan ug hinatagan mao pa hinuon ang magbuot.

Sa laktod nga pagkasulti, adunay mga tawo nga molihok apan dakong supak sa ilang kahimoan.

Dunay uban nga naghinubra ang pagkamapahitas-on. Kini tungod kay nagtuo man sila dako uyamot nga sila mismo makahimo sa tanan nilang gusto.

Daghang mga tawo ang nahimong entitled ra kaayo. Entitled tungod kay bisan dili na nila mahimo ila pa gyud pugson.

Ug sa maong pagpamugos ila pang anginon ang ubang mga tawo. Subo palandungon apan  maoy tinuod.

Dunay mga butang nga mahimo natong paundayonan ug tugotan nga mahitabo apan dunay mga butang nga dili gyud mahimo labina kun maghisgot na kini og privacy sa atong kinabuhi.

Ang pagtahud sa kinaugalingon ug pribadong kinabuhi haom nga himoon sa usa ka tawong mabuot ngadto sa ilang isigkaingon.  Kay dunay uban nga nagpunay lang og paniid sa imong mga sayop aron sa ingon makahimo og pang black mail. Ang resulta mao nga ang naghimo sa ingon mamahimong mahiagom sa gitawag nilang black and blue.