EDITORYAL - Solusyon o madugang sa problema?

Nahimong malampuson ang Emperyo sa Roma niadtong 476 A.D. mao ang ilang civil engineering. Ang ilang kamaayo sa paghimo og mga imprastraktura sama sa irigasyon, dams, mga kolesiyom, mga building ug uban pa maoy nakapalahi kanila sa ubang mga gingharian sa maong panahon.

Apan ang nakapakusog kanila ug nakapadali sa pagkatap sa ilang impluwensiya ug pagpanakop sa ubang mga nasyon mao ang ilang mga karsada.

Pinaagi sa ilang nagkutay-kutay nga mga karsada mas paspas ang transportasyon nagmalampuson sila ug nahimong usa sa labing kusgang emperyo sa kasaysayan.

Sa modernong panahon karon, ang karsada usa sa makapapaspas sa paglambo sa usa ka lugar tungod sa paspas nga transportasyon sa komersiyo.

Apan tungod sa kadaghan sa mga karsada midaghan sab ang mga sakyanan ug nanurok ang mga edipisyo hangtud nga lisod na ang pagpalapad sa mga dalan ug pagmentinar sa mga drainage systems.

Ang resulta, grabeng traffic nga nakaapektar na sab hinuon sa kalamboan sa siyudad tungod kay nagkamang man sab ang komersyo.

Sa mga naghuot nga mga lugar sama sa Cebu City dunay planong magtukod og dugang mga flyovers kay sa tan-aw sa mga utok niini, makasulbad kini sa problema sa trapiko. Makasulbad ba gyud o makapasamot hinuon sa problema? Depende kini tungod kay kinahanglang ikonsiderar ang tanang maapektahan sa palibot diin kini tukoron.

Maapektahan sa positibo ug negatibong paagi ang mga balay patigayon, kinahanglan sab ikonsiderar ang preserbasyon sa mga kabilin sa kasaysayan nga kinahanglang protektahan tungod kay dili na kini mabalik pa. Nabantayan nga kining mga lugar nga gipamutangan og mga flyovers ang nawad-an na og tsansang makapanindot pa sa ilang mga lugar tungod kay natabonan naman sila sa estraktura. Maayo lang kining flyovers kun ang mga karsada sa kilid niini palapdan og maayo ug butangan gihapon og tag upat ka lanes matag kilid samtang ang isi’g ka tumoy niini palapdan sab ang mga dalan aron dili maghuot ini og dulhog sa mga sakyanan.

Ang pagsulbad sa problema sa trapiko sa mga siyudad dili pare-parehas mao nga dili magsilbi ang gihimo sa Manila dinhi sa Sugbu. Kay bbasin ang solusyon mahimo na hinuong problema.