Matud pang Fulton Sheen

“Evil may have its hour but God will Have His Day!”

Dunay mga higayon nga makaingon ta nga mas maayo pa nga wala ta mahimugso tungod ba  kaha sa daghanan kaayong mga kalisdanan nga ania naghasi kanato? Dugang pa niini ang mga kalisod nga nihampak kanato giisip man natong usa ka dakong tunglo.

Gisilotan ba kita? O basin baya kun ang yawa maoy naghimog kadaut kanatong tanan mao nga hangtud karon kita gisakit sama kang Job nga gidangatan.

Tinuod man nga ang pandemiya maoy nagnudnod kanato sa kangitngitan. Kangitngitan sa panudlanan, kangitngitan sa panghunahuna ug balatian, labaw na kangitngitan sa pagkab-ot sa mga gilauman, anugon kaayo ang tanang paningkamot kun sa kawalay kapaingnan mahugno ang tanan. Evil may have its hour.

Apan luyo sa maong dakong kalisdanan, anaa man ang dakong kahayag nga kanato makatabang. Kahayag nga maghatag kanato og kalipay ingon man kadasig aron magpakabuhi pa taliwala sa mga kalisdanan.

Kining maong kahayag nga atong gihsigutan mao man ang Dios ng gituohan.

God will have His Day, matud pang Fulton Sheen ang balaanong obispo ning atong kapanohan.

Namatay naman tuod siya apan pabiling buhi ang iyang mga pagtulon-an nga kanato makapadasig hangtud karon.

Daghan ang buot moalagad sa Dios. Apan ang kanhiay maayong tinguha mamahimong mahulipan sa mga hunahuna ug motivation nga kalibotanon. Nahikalimot kita sa bisan unsang Diosnon.

Kay lagi daghanan kanato nagtuo man pud nga kita mga Dios mao nga buot natong tukoron ang monument sa atong kabantog.

Kaanindot kun ang Dios lamang ang atong hunahunaon. Kaanindot kun ang Dios lamang gyud unta ang anaa sa atong kinabuhi.

Kun kini mahitabo wala na nato kinahanglana ang balaod sanglit ang Dios mao man ang balaod sa gugma nga atong gitinguha.