Akong saaran

Kini ang pasalig sa usa ka parokyano sa dihang naghinangat pa ang pangilin ni San Jose. Tuod man, nihatag gyud siya.

A promise is always a promise matud pa. Nagpasabot lamang kini nga sagrado ang matag panaad.

Sagrado nga kinahanglang hatagan og igong katumanan kay kun wala ang kasagado niini nahimong bakakon ug dili katuohan.

Sama pananglit sa usa ka lider nga sa dihang padung pa siya nilansar sa posisyon nga gikahinaman hugtanon ug emosyonal kaayo nga nipadayag sa iyang tinguha nga panalipdan ang nasud gikan sa bisan kinsang mga langyaw nga padayong moilog sa atong giisip nga atoa. Apan kadtong maong panaad nahimong bakak lamang sanglit wala an diay kini mahatagi og katumanan labina ning mga panahona. Kitang tanan sayud niini.

Ang paghimo og panaad ingon nga sagradong buhat mahitao labina kun sa imong pagbungat niini dunay mga saksi nga nagpaminaw.

Tingali sa dihang gihimo sa maong politiko nga ang maong panaad tinguha niya nga makakuha og pogi points aron kadaugan maseguro.

Apan pagligid sa daghang katuigan nahimong daw nabag-as ug natun-as ang maong panaad.

Pun-an pa sa mga artistahon nga historians nga buot motuis sa nalatid nga mga kamatuoran sa atong kasaysayan.

Unya dili pa lang dugay iyang giingon nga walay sayop kay ang matag usa entitled sa ilang kaugalingong opinyon.

Ingon ini na ba gyud kamabaw ang ilang pagtan-aw kanato? nga dili na lang gyud ta hatagan og tukmang kasayuran ug lingaw lingawon lamang sa ilang mga binuang? pagkapait baya.

Balik sa parokyano. Akong nakita nga matinud-anon kaayo siya niini sanglit ang maong saaran gihimo man niya sulod na pud sa daghang mga katuigan.

Yano nga pagpakita sa pagpakabana. sa panginahanglan sa kadaghanan ug sa katilingban.

Ang paghatag segun sa makaya basta pinasikad lang sa gugma dako naman kaayo og kahimoan aron sa ingon mamahimong maayo ang tanan.

Unta ang tanan matinumanon sa saad bahala na og ginagmay ug yano nga saad ang mahinungdanon kini himoon nga balaanon.

Matud pang Master Windu: Kinsay buang buangon ang nagbinuang o ang nagsunod sa maong binuang?