EDITORYAL - Kinsa may sad-an?

Dili perpekto ang tawo mao nga dili na angay ikahibulong nga kini masayop. Apan nabatasan na sab sa tawo mangita og tawo nga maoy basulon kun sila magatubang og mga kalisdanan sa kinabuhi nungka moangkong sila sab nasayop o maoy hinungdan.

Ning bag-o, daghan ang nagbagulbol tungod sa balita nga higpitan pagbalik ang pagbantay sa mga utlanan sa palibot sa Dakbayan sa Sugbo ug ang pagpangusog na sa pagpangsita sa mga tawo diha sa gawas kun nagsunod ba sila sa executive order sa mayor.

Ang maong lakang gihimo ni Mayor Edgardo Labella human sa sagunson nga pagsaka sa mga bag-ong kaso sa novel coronavirus disease kada adlaw dinhi sa siyudad. Niadto lang adlaw nga Sabado, miabot og 58 ang bag-ong kaso. Nabantayan sa nangaging duha ka semana nagkaanam og saka balik ang mga kaso gikan sa ubos unta kaayong ihap sa nanglabay nga mga adlaw nga miabot pa gani og usa nalang ang nadugang sa bag-ong napositibo sa Covid-19.

Ang Covid-19 nipakamang sa ekonomiya sa nasud ug lakip niini ang Sugbu, ang resulta daghan ang nawagtangan og trabaho ug menus ang panginabuhian. Daghan ang nagsalig sa ayuda sa gobiyerno, apan karong wala nay ayuda.

Isip mayor sa dakbayan gipangitaan ni Labella  og pamaagi aron makabalik sa panginabuhi ang mga tawo, gitinguha niya bisan ang mga traditional jeepney drivers nga makabalik sa pamasahero.

Apan takulahaw lang, nisaka pagbalik ang mga kaso sa dakbayan.

Nalusbo ang kalibotan sa mga tawo kay maghigpit na sab ug posibleng dunay mga panginabuhiang maapektahan nga unta karon palang mibalik sa pagbangon.

Karon way laing mahimo si Labella kondili ang paghigpit og balik, aron protektahan ang katawhan.

Dili tiaw ang sakripisyong gibuhat sa gobiyerno aron makontrol ang pagkuyanap niini sa katilingban. Apan kinsa may angay basulon niining pagbalik og saka sa mga kaso sa Covid-19?

Ang mayor ba gihapon o ang mga tawong milugak sa ilang pagsunod sa minimum health protocols?  Lisud ba diay ang  pagsuot og facemask, face shields, physical distancing ug paghugas sa mga kamot?