EDITORYAL - Overdosed nga tambal

Ang pagpatuman og granular lockdown sa Cebu City gituohang maoy epektibong pamaagi aron pakgangon kining pagkatap sa novel coronavirus disease ug magpabangon sa ekonomiya.

Ang higpit ug lapad nga lockdowns niresulta sa kaliboan sa mga balay patigayon nga nanirado ug milyones ka mga mamumuo ang nawagtangan og panginabuhian.

Hinuon dili sama sa mga lockdowns sa nangaging mga buwan, granular lang o gagmay lang nga dapit ang maapektahan sama sa mga sitio, karsada, panimalay, compound o purok lang ang apektado.

Sa pagbuhat niini ang mga barangay kapitan ug ilang mga opisyales maoy gitahasan sa Inter-Agency Task Force pag-ila kun kinsa ang mga nagpositibo sa COVID-19 sa ilang lugar tungod kay sila maoy nasuhito sa ilang mga hurisdiksyon ug kun kinsa ang ilang mga residente.

Apan kinahanglang klaruhon kini sa mga barangay kapitan  kun kinsa gyud sa ilang mga molupyo ang dunay aktibong COVID-19 base sa mga resultang nigawas sugod Hulyo 9 hangtud Hulyo 22.

Siguraduhon kung nagpuyo ba gyud sa ilang barangay ang pasyente sanglit dunay mga nagpositibo nga dili diay tinuod namuyo sa address nga ilang gibutang sa ilang information sheet.

Kung dili kini klaruhon dunay posibilidad nga adunay mga silingan nga dili makauyon kay mapagan ug mahasol sa lockdowns.

Gawas pa, kun matumbok ang mga indibidwal nga kinahanglang ipaubos sa granular lockdown makamenus sab sa gastos ang dakbayan kay inay tibuok sitio, pipila nalang ka tawo ang kinahanglan nilang hatagan og ayuda.

Ikatandi kadtong mga lockdowns sa nangaging mga buwan kun sakit pa, mura kadto og “overdosed” nga tambal. Kini maoy mahitabo kun wala pa kaayoy klarong mga  diagnosis sa sakit, bombahan og tambal ang pasyente aron makita kun unsay mosalir.  Daghan kaayong mga impormasyon bahin sa kinaiya sa COVID-19 ang uwahi na kaayong nahibaw-an maong gipatuman ang lockdowns.

Apan wala napakgang sa lockdowns ang pagkatap, nihinay man tuod apan apektado ang ekonomiya sa nasud.

Iampo nalang sa tanan nga kining granular lockdown mosalir ning higayona  samtang gipaningkamotang mapabangon na og balik ang ekonomiya.