Kinatas-ang death rate sa Sibonga
Usa sa makahasol nga aspeto sa kampanya sa Sugbo batok sa Covid-19 mao nga nagpabilin nga mas taas ang atong death rate (gidaghanon sa nangamatay kon itandi sa kinatibuk-ang mga kaso) kay sa ubang bahin sa nasud.
Gitaho sa Department of Health (DOH) nga kinatas-an og death rate sa Covid-19 sa tibuok Central Visayas ang Lalawigan sa Sugbo (5.4%) nga sobra pa sa doble sa death rate sa Metro Manila (2.5%). Mas grabe bang mga pasyente o kuwang og katakos ang mga tambalanan pagluwas sa mga pasyente sa Sugbo?
* * *
Kinadaghanan og patay sa Covid-19 sa tibuok rehiyon maong Dakbayan sa Sugbo, nga niabot na og 415, o 5% sa kinatibuk-ang 8,302 ka kaso. Mas ubos nang death rate sa dakbayan kon itandi sa niaging semana apan nalansang nga mas taas ang death rate sa lalawigan.
Nihit ang mga detalye sa taho sa DOH. Wa hisguti unsang mga dapita ang nakatampo sa taas nga death rate sa lalawigan. Ang gibutangan og mga numero mao rang tulo ka dakbayan sa Sugbo, Mandaue ug Lapulapu nga di ubos sa Kapitolyo.
* * *
Maong nagsusi ko sa kataposang mga ihap sa mga kaso sa Covid-19 sa mga dakbayan ug mga lungsod sa lalawigan nga aktibo sa social media. Ug nakugang sa akong nahibaw-an:
Ang habagatang lungsod sa Sibonga ang kinatas-an og death rate, 27.2%, tulo ang patay sa 11 nila ka kaso;
Ang habagatang dakbayan sa Naga ang may ikaduhang kinatas-an nga death rate, 17.5%, 16 ang patay sa 91 nila ka kaso; ug
Ang amihanang lungsod sa Liloan ang ikatulo, 16%, 14 ang patay sa 87 nila ka kaso.
* * *
Hinaut nga mapasabot sa DOH ang kataas sa death rates sa Covid-19 sa Sugbo. Uwahi na bang nagpa-ospital ang mga pasyente? Kuwang bang health workers nga nag-atiman sa kritikal nga mga kaso?
Ang mas taas nga death rate sa Covid-19 sa Sugbo nakapaalarma sa pipila ka eksperto. Nagduda sila nga nagmatuod ni sa kadako sa kakuwang sa PCR testing. Nabalaka sila sa kahigayonan nga mas daghan pang kaso sa kabaranggayan ang wa pa mahibaw-i ug mahimong mas mograbe pang tinakdanay sa umaabot nga mga adlaw.
* * *
- Latest
