Ayaw pag-panic buying

Diay usa ka pagtulon-an nga angay ninyo nga makat-onan. Ayaw gyud dayon mo katarantar nga maglumba pag-adto sa mga groceries aron mag-ilog sa pagpalit og makaon kay mahadlok nga mahutdan sa baligya.

Mao kini ang nahitabo niadtong Martes, Miyerkules ug Huwebes nga taas kaayo ang linya sa mga tawo nga miadto sa mga groceries ug hapit na lang nila hutdon pagkompra ang mga baligya.

Tungod sa ilang gihimo, nakasinati sila og grabe kaayong kahasol tungod kay natagbaw man sila sa pagtindog nga maghuwat kon kanus-a sila makasulod sa tindahan aron makapamalit.

Kay huot na man kaayo, ang mga tagdumala sa tindahan, napugos pagbutang og mga entrance ug exits, ilabi na paingon sa display area sa mga karne.

Diha nga nakagawas na sa grocery ang mga namalit, pwerte na nilang luyaha nga nagbitbit sa ilang mga pinalit ug nagpaabot na usab og ilang kasakyan paingon sa ilang tagsa-tagsa ka panimalay.

Daghan ang nipahibawo nako sa pagdasok sa mga tawo sa mga groceries sa maong mga adlaw, kay nahadlok lagi sila nga mag-lockdown ug nga wa sila makaandam og pagkaon.

Pero wa gyud ko moapil sa maong mga tawo nga nag-ambahan paingon sa mga groceries. Akong nahunahuna nga moabot ra ang panahon nga mapul-an ra ning mga tawhana sa pagpamalit.

Aw tuod, kagahapon sa buntag, ako na sab ang miadto sa suki nakong grocery sa downtown area sa Dakbayan sa Sugbo, ug pila ra gyud tawon mi nga nangompra. Wa nay hasol, ug hayahay na kaayo ang pagsulod nga dili na maglinya.

Ang ikatambag nako sa mga pumapalit, ilabi na kadtong mamalit sa groceries, ayaw gyud mo pag-panic buying kay dili man mahitabo nga pasirad-an sa kagamhanan ang mga groceries.

Ang mga nagdumala sa mga checkpoints mohatag man gyud ninyo og higayon nga makagawas mo sa inyong balay, basta ang inyong tumong mao ang pagpalit og pagkaon, dili lang ang paglakwatsa.

* * *

Gikan sa akong payag, daghan ko og mga police checkpoints nga naagian. Gipahunong ang mga sakyanan, apan mga buotan man ang mga polis nga pagpakita nako sa akong ID, moderitso ra man og sinyas nga paderitsohon na lang.

Hangtod sa akong pagbalik, wa gyud ko makasuway nga gipangutana kon asa ko mopaingon. Ang tambag lang nako, pagsul-ob gyud mo sa inyong mga ID, unya pagsul-ob og face mask.

Pero, may mga tawo ko nga nakit-an nga naglakaw-lakaw nga wa magsul-ob og facemask.

Kining mga tawhana maoy angay’ng pangdakpon ug sa gikaingon ko na, dili sila angay’ng pasayaw-sayawon lang ug nga tudloan pag-rosaryo.

Dili ko malooy kon himoon ang mas estrikto nga silot alang niining mga tawhana nga mga badlungon sa katilingban.