Way maayong laki ning katalagman karon

Daghan sa mga Sugboanon karon ang naghandom nga pabalikon pagkupot sa renda sa City Hall ang kanhi mayor sa dakbayan sa Sugbo kay mas maayo kuno modumala sa kalihokan sa dakbayan, ilabina panahon sa krisis.

Sa nagsirkular karon sa social media, mikisaw na usab ang ikog sa politika. Kini sa dihang daghan sa kampo ni kanhi mayor Tomas Osmeña ang nag-akusar kang Mayor Edgardo Labella nga kulang kuno sa kapabilidad sa pagdumala sa dakbayan.

Kay kon si Osmeña pa kuno ang mayor karon sa siyudad, hayan maayo kuno ang pagdumala sa lokal nga pangagamhanan sa krusada niini batok sa pandemiya nga gikan sa usa ka virus nga mihasi karon sa kalikbotan.  

Apan sa pagkatinuod, walay maayong laki pagdumala og mga dakong katalagman, sama niining seryosong pagkuyanap karon sa makamatay nga coronavirus disease o COVID-19 nga mitakboy na sa subra sa otso milyones ka tawo sa kalibotan. Bisan pa kon si Jose Rizal mobangon gikan sa iyang lubnganan ug maoy modumala sa krisis sa dakbayan isip mayor, ambot lamang kon mosaler ba ang iyang pagka-national hero pagsulbad niini. Dili kaha siya magmahay nganong gibuhi pa?

Hinuon wala nako gipakagamay ang abilidad sa kanhi mayor. Dili malalis nga sa iyang pagpangatungdanan sa hataas nga panahon, daghan siya og nahimo alang sa dakbayan ug liboang lumulupyo niini.

Gani, kini ang rason ngano nga kadaghan siya masubli isip mayor sa siyudad kay daghan ang mibilib kaniya nga usa kuno ka maayong manager. Apan ambot kun mosaler ba usab kaha ang iyang estilo sa management sa krisis nga atong nasinati karon.

Ato nang nasinati niadtong paghapak sa supertyphoon nga Yolanda niadtong 2013 nga nagkayamokat gayud ang response sa mga LGU lakip na ang national government. Mao nang wala gyuy maayong laki niining klase sa katalagman. Dili na lang nato sagolan og pamolitika ang sitwasyon sa siyudad karon. Sa kadako ug kaseryoso niining problema sa coronavirus, angay pa man gani nga maghiusa ang tanan pagpuhag niini. Walay kumo sa magtinabangay.