EDITORYAL - Kinsay mabasol

Gibalik sa enhanced community quarantine ang Cebu City sugod Hunyo 15 ngadto na sa Hunyo 30, 2020 tungod sa padayong pagsaka sa gidaghanon sa mga nataptan sa novel coronavirus disease (COVID-19).

Daghan dayong mga posts sa social media ang nangita og tawong basolon sa nahitabo kun nganong nisaka ang gidaghanon sa mga kaso sa COVID-19 sa siyudad.

Angay hinumdoman nga mga numero na maoy nag-ingon nga padayon ang pagsaka sa mga kaso sa COVID-19 sa Cebu City maong kinahanglang ibalik kini sa mas higpit nga quarantine.

Nakita kini human nga gipaubos ang dakbayan sa general community quarantine sugod niadtong Hunyo 1 gikan sa ECQ midaghan ang mga nagpositibo.

Kung buot subayon, dihang gipangusgan sa mga mayor sa Cebu City, Mandaue City ug Lapu-Lapu City ang Rapid Test, ang Cebu City nga dunay kinadaghanan og kaso maoy nangiwit sa mga tawong nisanong sa test.

Nakita sa test nga kapin dos porsiyento sa populasyon sa Metro Cebu ang na-exposed sa infection. Unya, kani mao lang kadtong mga nagpa-test.

Nagpasabot nga posibleng dunay mga asymptomatic ng daan nga wala makaapil sa rapid test ug sa dihang nag GCQ sugod Hunyo 1, posibleng nanggawas ni sila ug nakatakod sa uban nga nagkompiyansa.

Sa pagpaubos ngadto sa GCQ, ang mga numero gihapon maoy gibasehan sa Inter-Agency Task Force on the Management of Emerging Infectious Disease ug pagtandi sa kasamtangang kapasidad sa health care system niini.

Apan ning bag-o, daghang mga post sa social media ang nanggawas nga gibalibaran ang ilang pasyente sa mga pribadong tambalanan.

Nigawas sa imbestigasyon sa DOH Central Visayas nga tinuod puno na gyud ang COVID-19 facilities sa mga tambalanan maong kinahanglang padugangan.

Karon ang pangutana, makatarunganon bang basolon sa nahitabo ang mga opisyales sa lokal o nasyonal nga kagamhanan?

O ang mga tawo nga wala motuman sa simpleng mga protokol nga daan na nga gipatuman?