San Isidro mag-uuma

Siya ang  patron sa Madrid ug nahimo siyang inila gumikan sa iyang pagkamaunongon nga bana ug manggihatagong igsuon alang sa uban.

Manggihatagon siya tungod kay bisan pa man sa kakulangan sa iyang panginabuhi maantigo gihapon siyang mopaambit sa iyang bahandi.

Bisan pa man kun siya giintriga nga kuno tapulan tungod sa iyang pagpunay og adto sa simbahan aron mag-ampo. Apan sa dakong kahikurat nakita sa iyang agalon nga si Juan de Vargas nga ang anghel maoy nihulip kaniya sa pagdaro.

Timaan lamang kini nga si Isidro buotan gyud nga tawo. Dili siya pari o relihiyoso apan ang iyang kinabuhi nisalamin gayud sa bisan unsang iya sa Ginoo. Hangtud karon padayon siyang naghatag kanato og inspirasyon.

Unsay implikasyon niini alang kanato?

1. Una, ang tawag sa pagkabalaan, tawag natong tanan. Regardless sa atong kahimtang sa kinabuhi, kitang tanan mamahimong santos sa atong kaugallingon ug ginagmay nga paagi.

2. Ikaduha, ang kakabus, dili babag aron kita manghatag. Kay walay dato nga wala magkinahanglan ug walay kabus nga walay ikatampo. Si San Isidro nakatampo tungod kay gimbut-an man niya nga taliwala sa iyang kalisud ang Dios sa iyang kasingkasing iya mang gipasulod.

3. Ang pagsulod sa Ginoo diha sa iyang kinabuhi dako man og kahimoan aron siya makadani usab sa uban. Mao nga hangtud karon padayon gihapon si San Isidro nga mohikap sa atong kinabuhi.

Ning panahon sa Covid-19 Pandemic unta kitang tanan mosunod sa sanglitanan nga gipakita ni San Isidro Labrador. Dili ron panahon sa pagpamintaha ni pagpalabwanay sa atong garbo kun kinsay angayan nga makadawat sa mga ayuda ug hinabang sa gobiyerno.

Hinunoa atong himoong paharion ang pagkamanggihatagon ingon man ang pagpakabana ning panahon sa pandemic…… Kay kun wala kitay pagpakabana, mag-unsa naman lang ang tanan alang kanato?

Dili ba mahimong mas miserable ang tanan? Kun si Isidro naghago nga mag-ampo makapaduol lang sa Ginoo kita kaha naghago ba aron sa Dios mas makaila? San Isidro Labrador, Ig ampo mo kami!