Maayo lang sa Sinugdanan

Nagpahigayon og simultaneous checkpoints ang Cebu City Police Office sa mga karsada sa dakbayan sa Sugbo.

Nakugang ang pangulo sa kapolisan sa iyang nasaksihan nga midaghan naman ang mga sakyanan nga nagbahisbahis sa kadalanan.

Gani mismo sa may Fuente Osmeña  naghuot gyud ang mga sakyanan, motor, four wheels ug uban pa nga mura'g normal nga adlaw lang nga wala pa gipatuman ang enhanced community quarantine.

Mura'g ang kuwang lang mao ang mga public utility vehicles kay halos mga private vehicles balik karsada naman.

Sukwahi niadtong unang mga adlaw sa ECQ nga mingaw kaayo ang mga karsada nga mura'g ghost town gyud ang dakbayan sa Sugbo pero karon ambot lang.

Bisan og naghuot ang mga sakyanan kay gikuti kuti na sa kapolisan ang pagsuhid sa ilang mga dokumento pero dili ikalimod nga dili gyud normal ang gidaghanon niini kung enhanced community quarantine ang hisgotan.

Katarungan sa mga nagbiyahe nga naa silay mga mahinungdanong tuyo o adtoan apan karon gikinahanglan nga i-justify sa mga private vehicles ang ilang katuyoan kay kun dili aw mahasol gyud sila kay dili naman palutson ug isyuhan pa gyud temporary operators permits (TOP).

Matud ni Police Col. Josefino Ligan ang pangulo sa Cebu City Police Office nga estriktohon na nila ang pagpatuman sa protocol ug si kinsa ang pwede makabiyahe sulod mismo sa dakbayan.

Irekomendar niini ngadto sa mga opisyal sa dakbayan sa Sugbo nga mag number coding sa mga private vehicles aron malikayan ang paghuot sa mga karsada.

Samtang pahimangno usab sa kapolisan sa mga tawong gahi’g ulo nga dili motuman sa social distancing nga dakpon na gyud nila.

Milapas na kuno ang mga adlaw nga nagsige og hangyo ang kapolisan sa social distancing busa karon dakpon na ug pamultahon.

Syaro og dili mahumok ang ilong niining mga badlongon kun tinud-on pagdisiplina.