Ihiklin ang garbo

Panahon sa krisis ug emerhensiya mahinungdanon ang pagpangandam ug ang tawtaw nga pagpaabot sa mga mensahe gikan sa kagamhanan. Mahinungdanon nga klaro ug tin-aw ang mensahe aron malikayan ang kalibog sa katawhan nga posibling mosampot sa kagubot ug kaguliyang. Sa dili pa mohimo og mga lakang ang kagamhanan kinahanglang siguroon nga hitsas ang pangandam ug nasabtan sa katawhan ang sitwasyon ug nasayod sila sa angayang buhaton.Apan dili ni maoy sitwasyon karon nga gipaubos na ang dakbayan sa Sugbo sa Enhanced Community Quarantine (ECQ) sugod kagahapon sa udto. Sugod gahapon sa udto kontrolado na ang paggawas sa tawo sa ilang mga pinuy-anan.

Kadto lang dunay ECQ pass nga gihatag sa dakbayan maoy tugotan nga makagawas sa ilang panimay aron pagpalit sa ilang mga panginahanglan. Dunay mga passes nga giisyu ang nagkalainlaing barangay apan kutob lang ni sa ilang dapit ug dili ka mahimong mogawas sa laing barangay.  Kun moadto ka sa laing barangay aron mangompra kinahanglanon nimo ang passes gikan sa City Hall. Apan ang problema kay nagsugod na sila sa pagpatuman sa ECQ nga wala pa gani makapang-apud-apud sa passes nga gikinahanglan.

Dili sab klaro unsay paagi sa pagpanghatag sa passes ug si kinsa maoy manghatag?

Adto ba sa City Hall kuhaon o adto na sa barangay o ba kaha adto sa MILO o ang mayor’s information and liaison office.

Laing nakadugang sa kalibog sa publiko mao ang tagunhos nga pagpatuman sa ECQ sa syudad sa Sugbo ug sa mga silingan niini ug sa tibuok probinsiya.

Mas hapsay unta ug naibanan ang kalibog og gidungan pagpatuman ang ECQ sa dakbayan ug ang tibuok lalawigan.

Apan gusto gyud kuno nga mag-una si Mayor Edgar Labella tungod kay gusto siya nga dunay seremonyas.

Bisan gihangyo ni Gobernador Gwen Garcia nga modungan sa tibuok lalawigan karong Lunes aron malikayan ang kalibog sa publiko, nagmagahi ang mayor.

Sa akong nasabtan gikan sa mga alipores sa mayor, daw sa nainsulto kini sa mga unang lakang nga gihimo sa probinsiya.

Pastilan, niining panahon sa krisis way luna ang personal ninyo nga garbo. Mas labaw’ng mahinungdanon ang interest sa katawhan kay sa garbo sa mga politiko.