Paglighot ni Koko

Niay ehemplo nga magmatuod nga ang lawmaker is a lawbreaker. Ang Senado maoy tigpandayg balaod. Sa ato pa, ang mga senador, kun adunay lutoong balaod, kinahanglan silang tanan masayod niini, tan-awon-susihon pag-ayo ang gitak-ang, hasta mga lamas tsek-apon, unya pagasaw-an o tilawan unsay lami sa giluto.

Kun magustohan sa mayoriya, walay misupak, o bisag dunay diyotayng wala makauyon, kini pagdebatehan man tuod, apan modaog gyod ang mayoridad. Ug ang Senate Bill hingpit nang mahimong balaod.

Si Aquillino ‘Koko’ Pimentel III, dili lang tiglutog balaod sa Senado.  Miagi pa gyud og pagka-Senate President. Nga sa ato pa, gikan sa gamay ngadto sa dako, suhito kaayo sa balaod. Siya nasayod, nga ang mosupak, may tulubagon gyod. Busa, angay gayod motuman.

Apan ulaw kaayong palandungon, nga ang Makati Medical Center (MMC) nahimangod sa gibuhat ni Koko, dihang iyang gisupak ang infection and containment protocols sa ospital batok sa gikaintapang coronavirus (COVID-19) sa miaging Miyerkoles, Marso 25, dihang iyang gikuyogan ang manganganakay niyang asawa sa maong ospital bisag na-positibo na siya sa mananakod nga kagaw.

Hinuon, nangatarungan si Koko. Nga dihang gi-admit niya iyang asawa sa miaging Martes, Marso 24 sa gabii, sa sayo pang bahin, wala siya masayod nga positibo na iyang lawas sa COVID-19. Diha na siya masayod, human makadawat og tawag sa selpon, kinsa mitug-an nga ang resulta sa gipaabot niyang COVID-19 lab test, positibo.

Diin, ulahi na kaayo ang tanan. Sanglit, nakaestar na siya’g taudtaod sa ospital uban sa misis.

Ang pangutana, nganong mipugos ma’g kuyog si Koko nga wala pa man diay mahibaw-i ang pinaling resulta sa iyang lab test? Makaselebrar ba diay daan ang usa ka bar examinee bisag wala pa mogawas ang resulta sa mga nakapasar?

Hinuon, makasabot man ta. Nga nabuhat kadtong Koko tungod sa iyang dakong gugma sa asawa niya. Ang pait, kay nalimtan ang paghatag og gugma usab ngadto sa iyang katawhan, kinsa kadaghanan, kondili mamatay sa virus, mamatay sa gutom.

Ning gibuhat ni Koko, ubay-ubay’ng nars ug doktor sa MMC ang ikuwarentinas. Unta, walay matakdan nila. Kay kun aduna, mosamot kakulang ang mga aktibong medical professionals nga kulang nang daan.

Ay, Koko, kawala gyud intawon nimoy kaluoy!