Walay social distancing sa magtiayon

Tungod sa gipatuman nga lagda sa DOH nga social distancing, gidili na usab sa DOTr ang pagpasakay ug lain pa’ng pasahero sa motorsiklo gawas sa driver diin bisan anak o asawa sa driver, dili na man mahimo nga moangkas.  Apan alang sa akong amigo, walay pulos ang maong lagda sa social distancing ug no backrides kay inig abot sa balay, magdulog pa man gani ang magtiayon. Hinuon, adunay pipila ka asawa nga mosugot nga hangtud sa sulod sa panimalay, ipatuman ang social distancing kay aron kuno dili sila mapugos pagpakigdulog sa ilang bana nga walay kaligo.  Hala no!

Inadlaw ang kwentada

Human ipatuman sa kagamhanan ang community quarantine agi og pagbatok sa pagkuyanap sa coronavirus, nakasinati karon ang mga bangko ug daghang cash withdrawals sa mga depositor sa daghang bangko dinhi sa dakbayan sa Sugbo.  Hayan lumalabay ra ang maong kahimtang kay sagad sa molinya sa ATM kadto ra man mga wage earners.  Inig kahurot na sa ilang deposito o sweldo sulod sa ATM, undang na pud ang pag-withdraw.  Pamahayag pa sa akong silingan, “Inadlaw ra gayod intawon ang kwentada sa kinabuhi namong mga pobre”. Faeetz!

Likay sa baga, nasugba sa kalayo

Daghang mga pasahero ang natanggong karon sa Parañaque Integrated Terminal Exchange (PITX) tungod kay naabtan sa takna sa pagpatuman sa community quarantine. Tungod niini, ang kamanduan sa DOH nga social distancing wala na usab mapatuman didto sa terminal.  Inay mamauli sa probinsya aron makalikay sa corona virus, nabutang na hinoon sa dakong peligro nga matakdan ang maong mga pasahero tungod sa ila karong kahimtang. Mao na’y giingon nga, “Nilikay sa baga, nasugba hinoon sa kalayo”.  Saoonz!

Makalibog ang gobyerno

Kapin sa usa ka milyon ka beneficiary dinhi sa Central Visayas ang maapektohan tungod sa pagsuspenso sa DSWD sa ilang mga programa ug serbisyo sama sa programa sa Social Pension on Indigent Senior Citizen, Unconditional Cash Transfer (UCT) ug 4Ps Program.  Kon kanus-a kinahanglanon pag-ayo ang hinabang sa tawo, karon na hinoon gisuspenso.  Makapahinumdom kini sa istorya sa usa ka Muslim nga nagkanayon, “Makalibog ang gobyerno. Moingon nga wala’y kwarta. Unya kon tabangan nato buhat ug kwarta, dakopon kita”.  Pagkatoytoy!

Mapuslan o molaag lang

Miluwat ang DepEd og memorandum nga miuyon nga wala na’y ipahigayon nga pasulit o final examinations sa mga tulonghaan labi na kadtong anaa mahimutang sa lugar nga hugot nga gipatuman ang community quarantine.  Hayahay ang kinabuhi sa mga estudyante, wala na’y klase, wala pa gyud sila’y pasulit.  Ang pangutana: MAPUSLAN BA KAHA SILA SA PANIMALAY O MAGPUNAY LANG UNYA OG LAAG-LAAG? Na hala, mga ginikanan, ATIMANA!