‘Nahigugma lang ko’

Wala mauwaw si Police Major Ildefonso Miranda Jr., hepe sa Argao Police Station, bisan sa iyang pagkasikop tungod sa pagpakigdulog sa usa ka batan-ong piniriso diha sulod sa iyang buhatan. Dihang nahinabi ni Sheriza Uy, correspondent sa Banat News, human sa iyang pagkasikop, matud ni Miranda nga wala siya makahimo og linuog nga krimin.

“Ang akong sayop tungod kay nahigugma lang ko,” matud sa opisyal samtang nanglugmaw ang iyang mga luha.

Gidakop si Miranda sa mga sakop sa Integrity Monitoring and Enforce Group (IMEG) niadtong Huwebes sa gabii tungod sa reklamo nga iyang gipagawas ang duha ka mga babaye’ng piniriso. Ang usa gihimong kusinera samtang ang usa iyang giluon sa opisina.

Dihang gisulod sa mga sakop sa IMEG ang police station sa Argao ilang nasakpan sa akto nga didto sulod sa buhatan ni Miranda ang piniriso. Kini maoy katapusan sa iyang career isip opisyal sa kapolisan.

Matud sa hepe sa Police Regional Office-7 nga si Brigadier General Albert Ignatius Ferro, tulo ka mga kaso ang atubangon ni Miranda nga posibling moresulta sa iyang pagkataktak sa serbisyo. Akoy gianugnan sa iyang career tungod kay naamong lang sa usa ka babaye. Tabla ra og gilabay ni Miranda ang milyones nga nagpaabot niya isip retirement benefits.

Subo nga huna-hunaon nga samtang gisaulog ang buwan sa kababayen’an, usa ka babaye ang nahimong hinungdan sa pagkagusbat sa kaugmaon sa usa ka opisyal sa kapolisan. Dili hinuon ni unang sugilanon nga atong madunggan nga ang kaanyag sa usa ka babaye maoy nahimong hinungdan sa pagkapukan sa usa ka masaaron unta nga career.

Usa sa labihan ka popular nga estorya mahitungod niini mao ang sugilanon sa Trojan war nga kabahin sa Greek Mythology. Ang kaanyag sa usa ka babaye nga si Helen mibihag sa kasing-kasing sa usa ka prinsipe sa syudad sa Troy nga maoy naghaling sa dakong gubat tali sa mga Greeks ug sa gingharian sa Troy.

Si Helen nga asawa sa hari sa Sparta nga si Menelaus nakigtaban sa prinsipe sa Troy nga si Paris. Ang illegal nilang relasyon misamput gyud sa pagkapukan sa ginharian sa Troy.

Samtang di maisip nga illegal ang relasyon nilang Miranda ug sa batan-ong priso tungod kay pulos man sila way kabilinggan, apan di husto ang gihimo sa opisyal nga gipagawas sa prisohan ang iyang hinigugma ug gihimong motel ang iyang opisina.

 Hinaut mahimong leksiyon sa tanang sakop sa kapolisan ang gidangatan ni Miranda.