EDITORYAL - May kalainan kaha?

Ang bag-ong gitudlong co-chair sa multi-agency panel nga Inter-Agency Committee on Illegal Drugs misaad nga iyang tutokan ang pagpamenus sa supply sa illegal drugs sa nasud.

Si Dante Jimenez, chairperson of the Presidential Anti-Corruption Commission mao na karon ang usa sa mga mangulo sa ICAD ug iyang makapares si Philippine Drug Enforcement Agency Director General Aaron Aquino.

Ang maong posisyon maoy gihuptan ni Bise Presidente Leni Robredo kinsa makadiyot lang kaayong milingkod ug gitaktak ni Pres. Duterte human nga nakigestorya kini sa taga United Nations Human Rights Commission ug uban pang grupo nga misaway sa duguong kampanya batok ilegal nga drugas sa administrasyon.

Dili na bag-o kining pamahayag ni Jimenez, kay dili lang siya maoy nianunsyo og sama niini. Apan subo lang, makapila na magilis-ilis og mga opisyales apan mao raman gihapon ug mas midaghan pa gani hinuon ang supply sa ilegal nga drugas karon.

Wala hinuon mosaad si Jimenez nga iyang pahunongon kining duguong mga pagpatay sa mga drug suspects nga maoy gitinguha unta ni Robredo.  Nisayaw ra si Jimenez sa kun unsay tukar nga gipatugtog.

Sama gihapon sa uban, nagtuo si Jimenez nga kun putlon ang supply momenus gyud ang ilegal nga drugas sa nasud. Sayon isulti apan lisod buhaton kay nakita naman nga sugod sa paglingkod sa pangulo, wala nay laing gipangusgan ang iyang administrasyon kondili ang ilegal nga drugas.

Apan inay nga magkagamay, nagkadaghan naman hinuon ang makuhang shabu, kun kaniadto sa dili pa si Duterte ang president, talagsaon ra kaayo ang tagsa ka kilo, karon tag tulo ngadto sa taglima ug duna pay napulo ka kilong shabu nga makuha gikan sa mga drug suspects.

Ambot tungod ba kaha kay kaniadto kadto rang mga gagmay maoy gisiguro og dakop samtang karon ang mga dagko na gyung nagsuplay ang gitarget. Apan makahibulong kay mga “new players” man lagi, gani ang uban habal-habal driver ra.

Atong paabuton kun si Jimenez makahimo og kalainan sa kasamtangang kampanya.