Spaghetti wires

Bitaw, dugay na man kaayo ni nga problema, apan ang mga hingtungdang kompaniya nagpakabuta-bungol man lang. Wala mokihol bisan sa awhag sa kagamhanan sa Dakbayan sa Sugbo.

Maoy atong gihisgutan dinhi kining mga kutay sa kuryente nga gawas hugaw ug ngil-ad tan-awon, makahatag og kakuyaw, dili sa mga motorista lamang, kundili kanatong mga lumalakaw sa kadalanan.

Hinumduman nga sa nangaging katuigan, ang atong kagamhanan pinaagi sa Konseho nag-awhag sa mga hingtungdan paglubong sa maong mga kable aron nga dili kini maka-pose og danger kanatong tanan.

Karon, pinaagi sa privilege speech ni kanhi Kongresista ug karon Konsehal sa dakbayan, Antonio Cuenco, mibanhaw sa maong awhag “to get rid of dangling spaghetti wires” sa atong kadalanan.

Matud ni Cuenco: “I am alarmed that several electric posts with matching dangling spaghetti wires are hanging all over our city. Clearly, this is an imminent danger to public safety, an accident just waiting to happen.”

Ang City Ordinance (CO) 1894 nga na-aprobahahn niadto pang Abril 25, 2001, nag-require sa tanang sa tanang public utilities pagbalhin sa nagbitay nga mga kable ug paglubong niini.

Gisugdan na kini sa Visayan Electric diha sa Capitol-Fuente Circle corridor, apan, wala na kini nila sundi og lain pang trabaho.

Mga 20 na katuig gikan sa pag-aprobar sa ordinansa, apan nagpabilin nga wala mapatuman ang maong ordinansa.

Giingon dinhi: “penalizes the president and/or general manager of the company that violates its provisions. Aduna na bay nasilotan ug namultahan?

Of course, daku kaayo’g gasto ug nagkinahanglan og taas-taas nga panahon ang pagpatuman sa ordinansa, apan dili kini hiumon nga babag o excuse sa pagtuman sa ordinansa.

* * *

Madayon gyud diay ang Bus Rapid Transit (BRT)? Apan dili karon dayon o ugma dayon. In the meantime, usa ka interim alternative bus service ang ipahigayon gikan sa Fuente Osmeña padong sa Talisay City, sugod karong Marso 15.

Gitakda nga magsugod sa partial operation ang BRT sa Disyembre sunod tuig pa. Phase one sa partial operations BRT manukad sa Cebu South Bus Terminal paingon sa Capitol by December 2021; ug ang phase 2 manukad  sa Bulacao/Talisay hangtud Talamban, kini by March 2022. Dugay-dugay pa gyud. Sige , lang, at least duna kitay mapaabot nga kalamboan.

Ang 39.88-kilometer nga rota sa BRT route muabot sa Talisay City,apan, matud ni Sec. Tugade ang technical working group naglaraw nga ila kining paabuton hangtud  San Fernando.

Kining interim nga mga bus augmentation, matud ni Tugade, una kining lakang, first phase, ug ang BRT ug ang monorail ug cable car system mosunod ra.

Ang cable car system, manukad sa Mactan-Cebu International Airport latas sa Mactan Channel paingon sa downtown Cebu City. Nindota no? 

Ang detailed engineering design study alang sa BRT project, matud pa, “is now under review and validation” Sige pa diay ang pag-review niini hangtud karon? Ug ang Cebu Monorail project, mao pay pag-evaluate?

Of course, daku ang atong paglaom nga mapatuman kining tanan dinhi sa atong dakbayan, pinaagi sa “build, build, build” project sa Duterte administration. Mga damgo kini nga sa unang mga administrasyon nagpabiling damgo.