Pabtuo sa Bag-ong Tuig padayon

Gidili sa katawhan ang pagpabuto sa mga firecrackers o fireworks nga sagad buhaton sa kadaghanan panahon sa pagsugat sa Bag-ong Tuig. Kini sumala pa sa nalatid sa Executive Order (EO) No. 28 ni Pres. Rodrigo R. Duterte diin iyang gitugyan sa mga Local Government Units (LGU) ang desisyon sa hugot nga pag-implementar niini.

Giklaro sa presidente nga wala siyay tumong nga kuhaan og kapanginabuhian ang mga nagnegosyo’g pabuto. Matud niya, dili kumo kay naggunit ka’g pabuto, nakabuhat ka na’g usa ka krimen.  Dili lang gyod siya makaakong magtan-aw sa mga bata nga mangaputol ang tudlo, o mangabuta tungod sa pabuto.

Mao nga napanday niya ang EO No. 28 aron i-regulate ang pagpaninda’g pabuto ug usab maproteksiyonan ang katawhan labi na ang mga bata sa dugoong disgrasya nga idulot sa traydor nga super lolo o whistle bomb, diin dihang gidagkotan, wala mosirit ug mo-whistle. Pero dihang gipunit, kalit lang mibuto.

Zero casualty ang tumong ning maong balaod. Balaod nga nagpakita’g dakong pagpakabana sa katawhan aron dili mahiagom sa kadautan. Pero anugon lang ang maong amahanong gakos ni Duterte. Kay dili tanan, mihangop-dawat niini. May daghang gahi gihapon ang misalikway sa iyang EO No. 28.

Sa mga subdibisyon, sayo pa lang sa gabii, may pipila na ka homeowners ang walay kukahadlok nga miduslit sa ilang pabuto. Samot na, pag-abot sa tungang gabii, pag-abot sa tuig 2020.

Daw gihiwa ang kangitngit sa kahait sa nagsigang mga pabuto ug fireworks nga misirit paingon sa itaas samtang sa ubos naglumbag sayawsayaw ang nagkalainlaing pabuto nga gidagkotan sa nag-indigay’ng silingan, nagpalabwanay kinsa ang may mas daghan ug ang may kinakusogan?

Luoy ang mga tagbalay nga may batang gamay. Natagbaw intawog tabon sa mga dalunggan ni Inday, kinsa nahadlok sa kusog nga butobuto ug miluklok sa sayal ni Mommie. Samtang sa bentana, nanulod ang mga saag aso ug nasingo ang baho sa sunog nga pulbora.

Ambot, may duol man untang police station ug nganong walay gyoy bisan usa sa mga masupilon ang nadakpan? Hain man diay ang mga mananakop ning higayon nga dapat mag-roving sila sa mga dapit nga may nagpabuto?

No wonder! Mga pabuto sa Bag-ong Tuig dili gyud mawagtang.