Hugaw sa City Jail

Dugay na gyud nga reklamo sa mga residente sa Barangay Kalunasan ang hugaw nga tubig gikan sa Cebu City Jail nga direktang gihagbong sa mga tagdumala sa prisohan sa kanal gawas sa maong prisohan.

Ang hugaw nga tubig naghatag ni og di maagwanta nga kabaho sa palibot nga posibling mamahimong hinungdan sa sakit.

Apan taliwa sa mga reklamo, padayong nagpakabuta-bungol ang mga tagdumala sa prisohan ug ang mga opisyal sa dakbayan sa Sugbo.

Dayag ug makita sa kadaghanan ang pagdagayday sa tubig paingon sa kanal nga usahay duna pay dala nga hugaw sa tawo. Apan inay nga hunongon ang pagpagawas sa ilang hugaw direkta sa kanal, igo lang habwaon matagkaron ug unya ang septic tank sa prisohan.

Dili ang paghabwa sa septic tank maoy tubag sa dugay na nga reklamo kon dili ang pagbutang gyud og water treatment facility.

Hangtud kanus-a hasulon sa mga opisyal sa bilangguan ug sa dakbayan ang mga molupyo? Ug hangtud kanus-a pasagdan sa mga hingtungdang ahensiya sa gobyerno ang dakong kalapasan sa balaud sa kalikupan?

Dugang sa kahasol nga dugay nang gihambin sa mga molupyo mao ang kabaga sa mga dalaw nga gipasagdan ra sab sa mga opisyal sa prisohan ug sa barangay.

Sa matag higayon nga dunay dalaw sa prisohan, makalilisang ang basura nga ilang ibilin sa daplin sa dalan.

Gabii pa lang sa dili pa ang dalaw, magsugod na pagpangabot ang kabanay sa mga priso ug anha na sila mangatulog gawas sa prisohan.

Gipasagdan sila sa mga tagdumala sa bilangguan ug sa barangay nga mangligdas daplin sa karsada.

Wala gyud untay problema bisan ila nang gibabagan ang karsada ug hapit dili na makalusot ang mga sakyanan. Apan ang problema kay labihan nilang kahugawan nga di gyud kamao maikog sa basurang ilang gibilin.

Hinaut mabadlong sa mga opisyal sa barangay ug sa dakbayan sa Sugbo ang paghugawhugaw sa palibot sa bilanggoan.

Ug labaw sa tanan, hinaut kahatagan na nila og solusyon ang problema sa hugaw nga tubig gikan sa pansayan sa prisohan.