Gift Certificate dapat walay expiry date

Dear Atty. Divine,

Duna koy nadawat nga gift certificate hinatag sa among company worth P5,000.00 nga gi issue sa usa ka dakong  department store sa among lugar. Ang akong plano unta nga dili sa kini nako gamiton karon ang maong gift certificate kay karong March mo-graduate ang akong anak ug mao kini ang akong gamiton sa pagpalit unya nako niya og regalo. Ang akong pangutana kun dili ba mo expire ning maong gift certificate? Kay basin og inig gamit nako dili na unya kini i-honor sa tindahan? Daghang salamat. —Delia

Dear Delia,

Kining pag issue og gift check or gift certificate dunay balaod nga angayang  pagasundon niini og kini mao ang Republic Act 10962 kon Gift Check Act of 2017. Basi sa  Section 4 sa maong balaod kini nagkanayon nga ang gift  certificate mamahimong gamiton isip pambayad sa goods and services ug magpabilin kining valid gawas lang kun manira na ang establisamento nga nag issue niini .Ubos sab sa maong balaod sa Section 5, nalatid sab niini nga ang gift certificate  kinahanglan nga way expiry date ug kinahanglan gyud kini nga i-honor sa issuer gawas lang kun kini na damage or nagisi nga diin maglisud na ang issuer sa pag-ila sa mga security ug authenticity features niini. Busa kun sa Marso pa nimo gamiton ang imong gift certificate wa kini problema kay magpabilin kining valid samtang bukas pa ang negosyo  sa nag issue niini Thanks and God bless. —Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi  sa akong column matag  Miyerkules, Sabado ug Domingo.