Nisiwil ang plano

Tataw nga dunay interest ang grupo nga buot mokontrolar sa preparasyon sa Sinulog 2020. Ang maong grupo maoy responsable sa mga lakang aron maguba ang maayong relasyon nilang Mayor Edgardo Labella ug Vice Mayor Michael Rama. Nasayod sila nga samtang magpabiling maayo ang relasyon sa duha ka mga opisyal sa dakbayan wala silay kahigayonan nga kontrolahon ang preparasyon sa Sinulog tungod sa Sinulog Foundation Inc. diin ang bise mayor maoy tsirman.

Ang una nilang gihimo mao ang paghulhog ni Labella nga tukuron ang Cebu City Sinulog Governing Board (CCSGB) diin sila milampos. Pinaagi sa CCSGB hinay-hinay nilang hukasan ang SFI sa katungod sa pagdumala sa mga kalihukan sa Sinulog.

Nisiwil ang plano dihang tulo sa mga opisyal sa CCSGB nga sila si Val Sandiego, Barney Borja ug Kenneth Cobonpue mipatawag og press conference niadtong Lunes aron ipahibawo ang plano alang sa Sinulog.

Atol sa press conference ilang gitug-an nga ang CCSGB maoy manimon sa preparasyon ug ang mga plano sa SFI kinahanglang moagi ug aprobahan sa board. Sa laktud wala nay papel ang SFI sa preparasyon sa Sinulog Festival nga ilang giamuma ug gipalambo sulod sa 30 na kapin ka tuig.

Ambot kinsay mga tawong nagpaluyo niining maong “interest group,” apan dili malalis nga sila dunay igong impluwensiya ngadto sa mayor. Mamahimong politika o ba kaha negosyo ray ilang motibo sa tinguha nga kontrolahon ang kalihukan sa Sinulog. Sayod ang tanan unsa ka daghan ug kadako sa negosyo sa maong kalihukan.

 * * *

Duna hinuoy gamay nga timailhan nga wala pa hingpit mahilo-i sa maong “interest group” ang huna-huna ni Labella. Kini tungod kay sa way panagana gialkontra sa mayor ang pamahayag sa tulo ka mga opisyal sa CCSGB.

Matud sa mayor nga di tinuod nga mas labaw ang CCSGB kay sa SFI. Labaw nang di tinuod nga ilang i-review ug kinahanglang aprobahan ang mga plano sa SFI. Gipasabot sa mayor nga ang SFI usa ka pribado nga kahugpongan busa walay gahom ang CCSGB nga dominahon kini.

Apan ang dakong pangutana hangtud kanus-a mapi-og ni Labella ang pressure gikan niining maong grupo? Dili kaha nga mawagtangan nalang gyud sa hingpit og papel ang SFI sa mga kalihukan sa Sinulog?