Kadaghang drug users

Sus, duha pa lang gani ka adlaw sa pagpahigayon og drugtest sa mga kawani sa Cebu City government, 18 na ka kawani ang napositibo sa shabu.

Kon ako ang pagbut-on, angay’ng taktakon gyud kining mao nga mga kawani nga drug users kay dili sila haum nga motrabaho sa kagamhanan.

Dakong insulto kang Mayor Edgardo Labella nga sila motrabaho ubos sa iyang administrasyon.

Wala gyud ko masayop kay gibutyag ni Mayor Labella nga ipataktak gyud niya ang mga kawani nga napositibo sa drugtest.

Ang 10 gikan sa Probe Team, ang duha gikan sa Department of General Services (DGS), lima sa Office of the City Markets, usa sa Civil Registrars Office.

Dihang konsehal pa si Labella, siya maoy nagmugna sa ordinansa nga angay’ng i-drugtest ang mga kawani sa siyudad aron mahibaw-an kinsa ang tiggamitan og ilegal nga drugas.

Hinoon, ang mga “regular employees” hatagan gyud sila og “due process” ug paatubangon gyud og imbestigasyon.

Apan kay sagad sa mga napositibo mga “job order workers” man, angay sila nga taktakon dayon.

* * *

Nasupalpal ang pangulo sa Sinulog Governing Board human nga gitataw gyud ni Mayor Edgar Labella nga dili tinuod nga mas hawod pa sila kay sa Sinulog Foundation Inc.

Ang katin-awan ni Mayor Labella gihimo kay usa ka opisyal sa Sinulog Governing Board miingon nga kinahanglan pa nila nga i-review ang mga nahukman sa SFI.

Matud sa mayor nga iya-iya og katungdanan ang mga sakop sa SFI ug SGB, ug walay maingon nga may labaw kanila.

Maayo kay giklaro kini ni Mayor Labella kay ang gisulti sa opisyal sa SGB makapahiubos kaayo kini sa mga sakop sa SFI nga sa dugay’ng panahon maoy nagdumala sa kalihokan sa Sinulog.

* * *

Karon nga ang Cebu City government nakaangkon na usab og 21 ka bag-ong garbage compactor trucks, angay’ng atimanon kini pag-ayo sa mga tagdumala sa Department of Public Services.

Husto si Mayor Labella nga masuko ngadto sa mga tinugyanan sa DPS kon pasipad-an ra nila ang nga brand new nga garbage compactor trucks.