Kagubot sa CITOM

Pipila ka traffic enforcers ug mga traffic police personnel sa Dakbayan sa Sugbo gireklamo ngadto ni Mayor Edgardo Labella kay nangilkil kuno og kuwarta gikan sa mga tag-iya og trucking services.

Dili kini basta-basta nga pasangil ug angay kini nga ipaimbestigar gyud, ug kon mapamatud-an nga tinuod, silotan ang mga hingtungdan nga mga kurakot nga tigpatuman sa balaod.

Tambag nako ni Mayor Labella nga ayuhon gyud nimo kini pag-imbestigar aron dili ka kahiubsan sa tawo nga nakatabang kaayo pagpadaog nimo sa miaging eleksyon.

Akong klarohon nga dili gyud mi suod ug si Ricardo Barandog nga gibutang ni Mayor Labella nga executive director sa CITOM, labaw na nga wala gyud ko’y kaila sa mga tag-iya og trucking services.

Nakabantay sila si Barandog nga si Mayor Labella naminaw ra sa reklamo sa mga tag-iya og trucking services nga namasangil nga nangilkil ang pipila ka traffic enforcers ug traffic police, bisan wala pa’y imbestigasyon.

Malipay kita kun tinuod man nga kontra kaayo ni Mayor Labella ang mga binuang, apan kinahanglang sutaon niya pag-ayo ang isyu.

Kun gikilkilan ang mga truckers, ipagawas ang ebidensya kun kinsa ang tawo nga nangilkil kanila.

Apan mentras nga dili pa nila kini mahimo, magduda ko nga ang reklamo nila ngadto sa mayor gihimo lang aron nga mailisan ug mawagtang diha sa pagdumala sa CITOM ang magsuong Barandog.

Gipaspasan man gud sa CITOM ang pagpanakop sa mga truck nga daghan kaayong kalapasan.

Ang tinuod, bisan og si Major Chuck Barandog wala gyud maghupot og katungdanan sa CITOM, apan kanunay niya nga gisuperbisahan ang iyang igsuong si Ricardo aron mausab ang imahe niini.

Daghang mga truck ang na-impound. Sama gud sa mga trailer nga giguroy sa mga prime mover, daghan niining mga trailer nga wala marehistro sa LTO.

Bisan ako kaniadto dihang deputized pa ko sa LTO sulod sa upat ka tuig, daghan ko og nadakpan niini.

Dili ikalimod nga gisakitan ang mga truckers sa hugtanay nga pagpanakop sa ilang mga truck, ug nagpalaban sila sa mga tawo nga suod ni Mayor Labella. Klaro nga ang tumong aron mawagtang si Barandog diha sa CITOM ug “tuloy ang kanilang ligaya.”

Hisgotan pa unta nato ang Crane Truck nga nadakpan sa CITOM, gi-impound, apan napa-release bisan sa adlaw’ng Domingo kay may mi-order nga ipa-release.

Dili si Barandog ang mi-order.