Political will with compassion

Nagdahum gyud ang mga  sidewalk vendors sa dakbayan sa Sugbo nga makabalik pa sila sa ilang pwesto inig human sa validation sa DILG karong Oktubre 5.

Kini human sila nakigkita kang Mayor Edgardo Labella kinsa miingon nga makapadayon sa ilang panginabuhi ang mga manindahay.

Apan wala kini magpasabot nga makabalik sila sa ilang kanhi gibutangan sa ilang panginahuhian.

Sa subli nilang panagtagbo ni Raquel Arce ang pangulo sa PROBE sa dakbayan sa Sugbo gidaygan gyud sila sa kamatooran nga makapadayon sila sa ilang panginabuhi apan dili na sa Osmeña Boulevard, Colon, ug N. Bacalso.

Pangitaan sila og pwesto nga kabalhinan diin magpadayon sa ilang panikaysikay aron mabuhi. Apil niini ang F. Gonzales Street ug naa pay onse ka merkado sa syudad sa Sugbo diin pangitaan sila og kaloklokan nga pwesto.  Murag wala kini hisabti sa mga vendors kinsa naghupot gihapon sa ilang paglaum nga mahulog lang sa false hope kay imposible naman nga mahitabo.

Angayan usab masabtan sa mga vendors nga dili ang mayor maoy nagbuot niining nahitabo sa kapalaran sa mga vendors kon dili ang pangulo mismo sa nasod nga gipaagi sa DILG.

Kinsa man ang gamhanan, ang mayor o ang presidente? ana lang ka-simple ang pangutana nga sayon ra kaayo tubagon.

Bisan pa tingali og moligid si Mayor Labella ug mohilak aron paminawon ni Presidente Duterte wala na gyud siyay mahimo kay gipamulong naman kini sa pangulo.

Ayaw ko ingna nga espesyal ang mga vendors dinhi sa Sugbo nga hatagan og oportunidad nga makapaninda daplin sa kadalanan?

Kun buot hunahunaon, gipatuman sa mayor ang gimbut-an sa presidente nga limpyohan ang mga agianan gikan sa mga obstruction apan sa samang higayon gihunahuna gihapon niya ang kahimtang nila pinaagi sa pagpangita og relocation.

Ang uban nga LGU gani sama sa Manila mura ra man og mga sagbot ang mga vendors didto nga gipangsilhig aron malimpyohan ang mga karsada.

Kun ang mga vendors ang palabihon ug paminawon sa mayor, tulin pa sa alas 4 masuspenso siya.

Political will with compassion ang gihimo sa mayor sa syudad nga usa ka win- win solution sa problema.