Faeldon naka 2 hits na

Kada after shift meeting sa among trabahoan, pirme namong pahinumdoman ang mga rank and file, labi na sa mga siaw, kinsa may barkadang officer, nga unta ampingan ug irespeto ang kataas sa posisyon niini.

Kay unsa ka mang matanga sa pagkaamigo kon sulod sa trabahoan pirme kang magpabadlong sanglit nagsalig kay naay higalang officer, andam molaban?  Dapat ampingan-irespeto siya.

Ingon niini ang nahuptang taras ni BUCOR Director Nicanor Faeldon nga iyang gipakita sa tibuok mausisahong kalibotan.Tungod sa sobrang pagsalig ni Duterte kang Faeldon, gitudlo siya sa higalang presidente nga maoy modala sa Bureau of Customs aron sulbaron ang naghitak korapsiyon ning maong buhatan. Apan unsay nahitabo?

Niadtong Mayo 2017, ang Bureau of Customs ubos sa renda ni Faeldon, giukay  sa grabeng kontrobersiya dihang nakasulod-lusot sa guwardiyadong balwarte ang P6.4B nga balor sa shabu shipment. Giimbestigahan sa Senado ang maong makalilisang nga kaso. Dunay mga pagduda nga dunay connivance ang duruha ka habig – mga BOC officials ug Chinese personalities. Hinungdan, nga nalusot ang kontrabandong P6.4B.

Katawhan nasagmuyo. Kay bisan pa sa hitabo, misalig gihapon si Duterte ni Faeldon. Gitangtang man tuod siya sa Bureau of Customs, apan gibalhin ra isip Director sa Bureau of Corrections (BuCor). Ug unsay nahitabo?

Aw, lain na usab nga kontrobersiya ang mibuto sa BuCor. Tiaw bay, 1,914 nga konbiktado sa heinous crimes gipamuhian? Tungod ba sa Republic Act 10592 or Good Conduct Time Allowance Law of 2013? Wala man silay labot ini?  Ug nganong gi-release mag apil ang tulo sa mga rapist-killers sa Chiong sisters sa miaging Agosto?

Dihang giimbestigar si Faeldon ni Sen. Panfilo Lacson panahon sa inqurry sa Blue Ribbon Senate Committee, diin mikonpirmar si Faeldon nga gibuhian na sa National Bilibid Prisons ang tulo, gusto pa gihapong moiwas sa pusoy.

Maayo gani kay nakorner ni Lacson. Ug miangkon sa tinuod. Bisag unsaog pagpanghinaw ni Faeldon, isip maoy director sa BuCor, apil gyod siya sa bisan unsay panghitabo dinhi.  Gani, sa final decision, siya maoy last touch.

Naka two hits na si Faeldon. Di ba siya maikog sa dakong pagsalig nga gikuwentas ni Tatay Digong sa iyang pagkatawo? Unta, mahayagan na ang nangitngit niyang panghunahuna.