Tulay kamatyanan

Nakaani og managlahing reaksyon ang kamatayon sa 16 anyos nga tinun-an ug football player sa usa ka pribadong tunghaan sa Sugbo.

Kinhi human giingong nagpakamatay pinaagi sa paglayat sa taytayan sa sa Mandaue ug Mactan.  Unang na-missing ang batan-on ug napalgan ang iyang lawas pagka sunod adlaw sa kadagatan.

Ang pag-ambak sa tulay nakuhaan sa cctv hinungdan nga giingong hikog gyud ang nahitabo.

Dunay uban nga nalooy ug gisayangan sa kinabuhi nga nausik apan naa usay mga tawo nga nagbugal bugal.

Pastilan aning ubang mga tawo diretso lang og hukom base lang sa ilang nadungog ug kaugalingong obserbasyon.

Apan angayan natong hinumduman nga dili tanan tawo makakaya pagpas-an og problema.

Busa angayan natong sabton kadtong mga huyang kaayo ang ilang endurance kon emosyon ug pangisip na ang atakehon.

Ang depression usa ka seryosong suliran nga dili angayan bugal bugalan, hinoon angayan nga tabangan ang mga tawong nakasinati niini.

Kun makamatikod kita og tawo o kaila nato nga masolob-on, gahilom hilom nga dunay problema mahimo ra natong kuhiton pangumustahon basin mo open sa ilang gihambin nga problema sa ingon mapugngan kon aduna may plano nga dautan.

Ang mga tulay sa Lapu-Lapu nahimo lang instrumento niadtong gusto mohunos sa ilang kinabuhi.

Gibutangan na kini og mga pulis nga mobantay, maayo kini nga lakang apan dili malungtaron tungod kay mapugngan man ang uban nga molayat pero kadtong gudtong maghikog mangita man gyud og pamaagi nga matuman ang ilang gusto.

Ang labing maayong tutokan sa kagamhnan ang mental health sa katawhan pinaagi sa paghimo og mga programa nga masolusyonan kini uban sa pakig alayon sa ubang mga organisasyon.

Walay bug-at nga suliran kun mapahungaw kini og matabangan sa pag pas-an.