Ang tinuod nga magpaabot

Di ikalimod nga daghan kanato ang gusto gyud magdali nga makaabot gyud  dayon sa deadline.

Apan subo lang palandugon nga dunay mga higayon nga sa atong pagdinali mosamot na nuon kita og kalangay.

Mao kini ang akong nasinati sa dihang molakaw ko padulong sa bukid sa dihang naguba ang akong multicab. Gibati ko ang tumang kapikal.

Gisapot ko sa hilabihan kay lagi daghang mga schedules nga naglaray niadtong panahona.

Apan unsang pagkaunsaa nga d unay niabot nga wala damha akong higala nga nihatag sa iyang hinabang alang sa among parokya.

Gawas sa maong paghatag nabuhong pud ako sa iyang mga sugilanon sa panaw sa iyang kinabuhi.

Dunay rason o hinungdan kun nganong naguba ang akong multicab.

Human sa pipila ka daklit naayo na kini ug pwede nang padaganon.

Human sa pipila ka mga gutlo nilakaw ko padulong sa akong adtoan timing pud kaayo kay ang mga tawo wala pa didto. Wa ko ma-late gani nag-una pako sa mga manimbahay didto.

Kay unsa ba gud ang pagpaabot? Ang pagpaabot dili pag-usik sa panahon kondili ang paghimo sa maong panahon sa kasamtangan ingon nga bugtong panahon nianang higayona.

Kini nagpasabot nga imo kining gahinan sa kinatibuk-an sa imong pagbati ug dili lang kay sa imong pagbati sa imong paghigugma.

Sa laktod, imong gihimong mahinungdanon ang tanan alang kanimo.

Mao nga dili ka buot nga mawala ang maong panahon nga daw sa way nahimo ug way kapaingnan.

Nindot man tuod nga mahiabot kita sa sayo nga panahon sa atong destinasyon apan mas mahinungdanon kaayo nga unta diha sa atong panaw sa kinabuhi atong hatagan og igong gibug-aton ang matag gutlo.

Tuod hamubo ug dalikyat ang akong pagduaw sa mga tunghaan kagahapon apan nalipay ko nga nahimamat ko ang mga bag-ong dagway nga akong alagaran ning laing hugna sa kinabuhing parianon.