Bagong normal

Nagkapuliki ang mga opisyal sa dakbayan sa Sugbo pagpanabon sa mga nagwangwang nga mga imburnal human sa nahitabong trahedya niadtong Sabado sa hapon diin usa ka 5-anyos nga batang lalaki ang nahagbong sa imburnal didto sa Barangay Basak-San Nicolas.

Si John Clark Ebua, sama sa ubang bata nga parehas niya og pangidaron, nalingaw kaayo nga naligo sa kusog nga bunok sa uwan. Apan sa wala damha nga hitabo, nahagbong ang bata sa imburnal ug gianod sa kusog nga bul-og sa baha.

Patay na nga nakit-an ang bata didto sa silingan  nga Barangay Basak-Pardo paglabay sa kapin sa 24 oras. Aron malikayan ang samang hitabo sa imaabot, gimando ni Mayor Edgardo Labella ang pagtabon sa tanang imburnal.

Sayo pa nga basulon ang pamunoan ni Labella sa dakong pagpabaya sa dakbayan hinungdan sa maong trahedya. Apan duna siyay dakong mahimo gawas sa pagtabon sa mga imburnal aron mahatagan og hustisya ang gidangatan sa bata.

Angayang imbistigahon sa mayor nganong wala matagad sa Department of Engineering and Public Works (DEPW) sa dakbayan ang pagtabon sa imburnal. Sigun sa mga kasayuran, niadto pang tuig 2010 nga abli ang maong imburnal og gipasagdan lang sa hingtungdang ahensiya.

Isip amahan sa dakbayan, hinaut siguroon ni Labella nga manubag ang tanang nagpasagad sa ilang katungdanan. Kun mahimo taktakon sa trabaho ug pasakaan og kasong kriminal. Mamahimong aksidente ang nahitabo sa bata, apan mahimo unta kining malikayan kun nagtuman pa sa ilang gimbuhaton ang mga hingtungdang opisyal.

Human sa trahedya nag-iyahay og panghunaw og responsibilidad ang mga kanahan nga opisyal. Matud sa taga DEPW wala silay report nga nadawat gikan sa barangay mahitungod sa maong problema. Ang mga opisyal sa barangay sa ilang bahin mibasol sab sa mga purok lider nga wala moreport sa sitwasyon.

Mao ni problema sa atong mga opisyal kay igkita lang sa mga sityo panahon sa kampanya. Kun dili pa lang unta hilig og pasinaw sa bangko ang mga hingtungdang opisyal, malikayan unta ang maong hitabo.

Ang kamatayon sa bata maoy sakit nga kamatuoran nga ang pagpabaya sa ilang mga trabaho nahimo na nga bag-ong normal sa ubang opisyal sa atong gobyerno.