Sekreto sa lana
Hinaot nga makapatubil ka sa imong sakyanan sa wa pay tungang gabii aron nga di dayon maigo sa lain nga uminto sa presyo sa mga produkto sa lana nga ipatuman sugod ugma sa sayong buntag.
Mao ni ang banabana sa mga eksperto sa industriya sa lana sa usbaw sa presyo sa ikaduhang sunudsunod nga semana:
Gikan sa 45 ngadto sa 55 sentabos matag litro sa krudo;
Gikan sa 15 ngadto sa 25 sentabos matag litro sa gasolina; ug
Gikan sa 40 ngadto sa 50 sentabos matag litro sa kerosene.
* * *
Labing dako nga hinungdan sa pagsaka sa presyo sa merkado sa kalibotan mao ang pagsulbong sa tensiyon tali sa Estados Unidos ug Iran sa kadagatan sa Hormuz nga mao ang agianan sa 17.4 milyones ka baril sa lana matag adlaw (20% sa kalibotanon nga suplay):
Gipahagsa sa Revolutionary Guard sa Iran ang $240 milyones nga US Navy Global Hawk drone niadtong Huwebes; ug
Pagmando ni US President Donald Trump nga ilusad ang military strikes batok sa Iran niadtong Biyernes sa gabii apan iyang gibakwi human gipahibawo nga 150 ka Iranians ang mangamatay.
* * *
Samtang gilab-as ang iyang tanyag sa pakigsabutsabot sa kadagkoan sa Iran, si Trump nga gilibotan sa mga magtatambag nga nangampanya og gubat sa Iran sa daghan nang katuigan nipahamtang og dugang ekonomikanhon nga mga silot ug nipasidaan nga mapapas ang Iran kon makigubat sa Estados Unidos.
Gipanghinaut hinuon nga mokalma ang sitwasyon karong semanaha.
Ug ang kaluya sa kalibotanong ekonomiya ug gubat sa patigayon sa China ug Estados Unidos gipaabot nga mobalik pagpa-ubos sa presyo sa lana.
* * *
Epektibo na karong Sabado ang lagda sa Department of Energy (DOE) nga i-detalye ang mga sukaranan sa pagpasaka ug pagpa-ubos sa presyo sa lana matag semana.
Atong bantayan kon magkinopyahay ba gihapon sa kausaban sa presyo sa lana sa Martes sunod semana.
Kana kon di kakuha ang mga kompaniya sa lana og temporary restraining order (TRO) gikan sa korte.
Niinsistir sila nga ilegal ang pagpugos nila pag-detalye pilay kompra gikan sa ubang kanasuran, bayad sa barko ug insurance ug pilay ginansiya. Kay mahimong ma-alkanse kon mahibaw-an sa kumpetinsiya ang giisip nga sekreto sa ilang negosyo.
* * *
- Latest
