Hangyo kang Mayor Labella

Kaming mga tinun-an sa Japanese Language Class nga giklasehan nga libre ug walay bayad diha sa Cebu City Public Library nalipay kaayo sa pasalig ni Mayor-Elect Edgardo Labella nga ipadayon niya ang pagsuporta sa maong programa ubos sa iyang administrasyon.

Nagtuo man gud kami nga human sa termino ni Mayor Tomas Osmeña hunongon na ang maong libre nga paghatag og edukasyon niadtong gusto nga makamaong mosulti ug mosuwat sa pinulongan nga Japanese kun Nihongo.

Dako gyud hinoon ang among pagdayeg kang Jazzy Sensei, ang among magtutudlo, nga bisan og dunay “suporta” nga wala na ihatag kaniya human nga napilde si Mayor Osmeña sa miaging eleksiyon, apan anaa nanudlo gihapon kini kanamo.

Ang tinuod dili baya maisip nga pamolitika ni Osmeña ang pagpaninguha nga adunay Free Japanese Language Class diha sa City Public Library kay bisan ang taga probinsya, apil man nga gidawat, ug dili man kay kadto ra nga taga siyudad.

Bisan og dili pa gyud kami maayong mosulti ug mobasa sa pinulongang Japanese, apan may nakat-onan na kami nga ideya bahin sa Nihongo, ug molambo pa kini kun ang bag-ong administrasyon ni Mayor Labella mopadayon sa maong programa.

Kun motrabaho ka gud karon sa Japan, kinahanglang makamao ka gyud mosulti og Hinapon. Gawas pa niana, kun mag-tour guide ka sa mga Hapon nindot kaayo nga trabaho. Mao kana nga “Watashi wa Nihongo wo benkyo shimasu,” sa ato pa, maoy rason nga mitoon ko’g Hinapon.

* * *

Isugyot gyud nako ni Incoming Mayor Edgar Labella nga tangtangon ang uban nga mga parking areas daplin sa mga karsada isip paagi nga mohapsay ang atong trapiko.

Sama sa V. Gullas Street ngadto na sa Manalili ug paingon sa Carbon, pastilan, ang kada kilid sa karsada gitugot ang parking. Ingon sa ginegosyo na gyud pag-ayo ang atong mga karsada dinhi sa dakbayan sa tumong nga makakolekta ang siyudad og minilyon ka pesos nga parking fees.

Apan wala nila tan-awa nga sa pagbutang og nag-atbang-atbang nga mga parking area sa mga sakyanan, nakamugna kini og grabeng kahuot sa trapiko. Kun usa lang ka kilid sa karsada ang paparkingan sa mga sakyanan, makatampo kini nga momenos ang problema sa trapiko.

Unta, matan-aw ni Labella kining maayo nako nga tumong dugay na kini nakong natan-aw nga makatabang kaayo sa pagsulbad sa problema, apan wala lang hatagi og gibug-aton ni Mayor Osmeña.