Seryosong alegasyon

Dakong bul-og sa katawhan ang midugok sa giingong miting de avance ni Cebu City Mayor Tomas Osmeña, Konsehal Mary Ann de los Santos ug ubang kandidato sa Bando Osmeña Pundok Kauswagan kaniadtong Domingo.

Katapusan kadto nga dakong hunat sa kampo ni Osmeña alang sa pagdani og botos sa mga Sugboanon. Sa kadaghan sa nanambong sa maong panagtigum, dili ikatingala nga mo-claim ang kampo sa mayor og dakong kadaugan karong piniliay sa Lunes.

Apan atol sa maong miting de avance, mibuto usab ang alegasyon batok ni Osmeña. Nagbandera gayud sa mga lokal nga pamantalaan ang hulagway sa mayor nga miapil kuno pagdula og poker sulod sa ilegal kuno nga sugalan.

Karon, adunay kaso nga gipasaka batok sa mayor gumikan kuno sa iyang pag-apil sa maong ilegal nga sugal didto sa Office of the Ombudsman-Visayas.

Gusto sa kihanti nga imbestigaron si Osmeña tungod sa giingong kalapasan niini.

Dili gayud ikalimod ni Osmeña nga dako kini nga hapak ngadto sa iyang kandidatura.

Kini ilabina nga pipila ka adlaw na lamang ug magpanon na usab kita ngadto sa mga polling precinct aron pagbotar alang sa sunod nga mga opisyal sa dakbayan.

Apan ambot kun unsa ka seryoso ang epekto unya niini sa iyang kandidatura.

Siguro mismo ang mayor makaadmiter gayud nga adunay dako nga epekto ang maong alegasyon sa iyang pagdagan pagpasubli pag-usab sa iyang posisyon.

Angay lamang nga tubagon ni Osmeña ang maong kaso nga gipasaka batok kaniya sa Ombudsman. Hinuon matud sa mayor nga andam ang iyang mga abogado pagtubag sa maong kaso nga naggumikan sa maong kontrobersiya.

Hinuon ang desisyon anaa lamang sa katawhan. Apan bisan pa man niini, kinahanglan nga i-esplikar sa mayor ang maong kontrobersiya ngadto sa mga Sugboanon. Amahan siya sa dakbayan ug angay lamang nga malinawan ang iyang mga konstituwente.