EDITORYAL - Di makaayo sa nasud

Dili makaayo sa Pilipinas ang bahad ni Pres. Duterte kun iyahang tinud-on kinig pagdeklarar og revolutionary government tungod mas daghang way labot ang maapektahan ug mahasol.

Si Duterte mibahad nga magdeklarar niini aron iyang ipadakop ang mga tawong nagsige og ataki kaniya ug sa iyang pamilya. Dili kini maayong buhaton sa pangulo tungod kay madugang kini sa kadaot nga mahiaguman sa iyang liderato.

Sayon lamang iestorya nga kadto ra gyung mga kritiko ug nangatake sa pangulo ang pangdakpon apan lisod salaon kun kinsa kining mga kritiko ug kun unsa kadako ang ilang pagpanaway sa pangulo.

Kini tungod kay mahimo man kining abusohon. Kadtong mga lunod-patay nga supporter sa pangulo posibleng moabusar ug gamay estorya sa mga silingan batok sa presidente mahimo man nilang isumbong ug gamiton ang otoridad aron pahilumon ang katawhan.

Kun mao kini ang mahitabo, magkagubot ang nasud ug mabuhi ang mga Pilipino ubos sa kahadlok kay mawala na ang ilang kagawasan sa pagpadayag nga gigarantiya sa Batakang Balaod.

Usa pa, dili sab maayong buhaton kini sa pangulo tungod kay base sa kasamtangang balaod sa Pilipinas, kun, magdeklarar og revolutionary government dinhi, otomatikong wala nay gahum si Duterte.

Ug subay gihapon sa balaod, ang duly elected vice president gyud maoy molingkod kun buhian sa pangulo ang posisyon aron mahimong revolutionary leader base sa rule of succession ug sa Konstitusyon nga maoy gisunod sa militar  ug ang militar suportahan gyud ang bise presidente subay sa ilang mandato.

Nagpasabot nga dili kini makatabang sa tumong sa presidente nga pahilumon ang iyang mga kritiko ug makapagusbat hinuon sa nasud.

Inay nga mohimo og ingon niini nga lakang, mas maayong palabyon nalang sa pangulo ang mga pagsaway sa mga kritiko ug pamatud-ang sayop ug wala gyuy mga basehan ang mga pagpanaway kanila sa iyang pamilya pinaagi sa pagpresentar og mga ebidensya.