Angay bang ibalik ang death penalty?

Taliwala niining linuog nga mga pagpatay ug uban pang ngilngig nga mga krimen sa nasud, daghang sektor ang nanawagan karon sa kagamhanan alang sa pagbalik sa capital punishment o death penalty sa Pilipinas. 

Gani bisan ang kapolisan dinhi sa lalawigan sa Sugbo lakip usab sa misugyot nga angay lamang nga ibalik ang silot nga kamatayon dinhi sa nasud.

Matud nila nga makaayo kini sa kampanya batok sa kriminalidad. Si Cebu City Police Office director Senior Superintendent Royina Garma miingon nga epektibo kaayo ang death penalty batok sa krimen.

Apan sa pangagpas nga ang desisyon sa korte makabitay na hinuon sa usa ka inosente, matud ni Garma nga dili hinuon otomatik nga pahamtangan sa kamatayon ang usa ka konbiktado sa death penalty tungod kay aduna pay mga korte diin siya makaapelar.

Alang kang Mandaue City Police Office director Julian Entoma nga nagsalig na hinuon ang mga kriminal tungod lagi kay wala nay silot nga kamatayon.

Kini gumikan kay, basi kuno sa ilang eksperinsiya, mas mograbe kuno ka bangis ang kriminal inig gawas nila sa bilanggoan.

Sa iyang bahin, si Cebu Provincial Police Office spokesperson Eloveo Marquez miingon nga angay unta nga gipabilin sa gobiyerno ang silot nga kamatayon. Matud niya walay dakong pangontra karon ang krimen hinungdan sa paggimok niadtong mga adunay demonyo og hunahuna.

Hinuon, dili gayud garantiya nga masupil sa death penalty ang krimen.

Gani, dinhi sa Pilipinas, pipila na ka higayon nga ato kining giimposar apan pabilin nga naghitak ang mga pagpatay, pagtulis, paglugos ug uban pang mga dagkong krimen.

Apan, alang kanako, mas angay nga ibalik ang silot kamatayon dinhi sa nasud.  Bisan pa man kun dili gayud kini ang solusyon sa krimen, apan dako kini og ikatabang pagbuyag niadtong adunay dautang lakang.

Kini tungod kay klaro nga magduhaduha gayud kadtong mga sagbot sa katilingban pagbuhat sa ilang kriminal nga binuhatan gumikan kay basin unya kun lethal injection o electric chair o firing squad ang ilang padulngan.

Sa ako nang gikaingon kaniadto, dili lig-on ang kagamhanan paggamit sa death penalty sa dihang giimplementar pa kini.

Tungod kay matag higayon nga adunay itaral ngadto sa kwarto sa lethal injection, abtik pa sa manatad ang simbahan ug ubang mga grupo pagbabag, hinungdan nga mainspluwensiyahan usab niini ang kagamhanan.

Kay kun abtik pa ang gobiyerno kaniadto paghuwis de kutsilyo sa mga konbiktado sa death penalty, siguro daghan sa mga kriminal ang nagpangurog ug magpanagana sa ilang yawan-ong binuhatan.