Teaching by example

Marso 3, 2019: Ikawalo nga Domingo sulod sa tuig

MGA PAGBASA:  Sir. 27;5-8/Sal. 92/1 Cor. 15;54-58/Lk. 6;39-45

Kini ang hagit sa matag usa kanato labina kanato nga mga hamtong ngadto sa atong mga batan-on ug mga kabataan.  Kini tungod kay usahay daghanan nato nahimong split diha sa atong pagbansay sa atong mga baruganan.

Nagpasabot kini nga lahi ang atong binuhatan kaysa atong pagtulon-an o dili ba kaha baruganan. Sa ebanghelyo karong Domingoha gipahinumdoman kita sa bili sa gitawag natong Teaching by Example.

Malisud tuod nga ang buta moagak sa laing buta kay siguro gyud nga mahulog sila sa kanal. Ang maayong kahoy gipaabot nga mohatag og maayong bunga ug ang dautang kahoy mohatag sa dautang bunga.

Ang bunga nga gipasabot niini mao man ang atong mga binuhatan nga nagasukad sa atong tagsatagsa ka mga kasingkasing ug hunahuna. Kay kun unsay sulod sa atong kasingkasing mao man gyud ang atong mabuhat ug malitok.

Tataw kaayo ang giingon ni Lao Tzu sa dihang siya mipahimangno: “Ang imong gihunahuna mao ang imong masulti, ang imong masulti mao ang imong himoon, ang imong mga binuhatan mao man ang imong naandan, ang imong naandan maoy imong kinaiya ug ang imong kinaiya maoy molatid sa imong destino!”

Nga sa ato pa kun unsay imong gigambalay sa imong hunahuna maoy moepekto sa kinabag-an labina sa mga tawo nga nagpalibot nimo. Aron mamahimong mas gamhanan ang atong pagpanudlo ug pagbadlong ato unang pangutan-on ang atong kaugalingon: “Andam ba akong mosunod sa balaod nga akong gilatid? Basin baya ug mahimo akong mosupil niini? Walk the talk matud pa ug kini ang kahulogan sa ilang giingon: “Teaching by Example!”