Way gibilin nga last will ang namatay

Dear Atty. Divine:

Duna koy pangutana may labot sa gibilin nga property sa akong live-in partner. Dili mi kasal ug wa mi anak. Namatay siya last year  ug duna siyay gibilin nga farm land ug house and lot. Kining farm land iya kining na-inherit sa iyang parents. Samtang ang house and lot iyang napalit before pa mi nagtipon.  Ang iyang sulti nako nga ang house and lot anha gyud niya ihatag nako samtang ang farm land adto sa iyang mga igsuon. Wa siyay gibilin nga last Will and testament sa wa pa siya namatay. Ang akong pangutana kon pwede ba nako maangkon ang iyang house  and lot basi sa iyang gisulti nako sa dihang buhi pa siya? Daghang salamat. — Lorna

* * *

Dear Lorna:

Basi sa atong balaod, ang bisan unsang matang sa pag-dispose sa real property kinahanglan gyud nga ‘in writing’ aron kini mamahimong valid. Sama pananglit sa pagbaligya sa property or pagdonar niini. Sa imo nga kaso, way gipirmahan nga Deed of Donation ang imong live- in partner aron paghatag  unta sa house and lot nganha nimo. Dili sab ka maka claim og share niini kay napalit niya ang maong property sa dihang wa pa mo nagtipon . Busa wa gyuy legal nga basihan ang imong pag-angkon sa house and lot. Ang maayo nimong buhaton mao ang pagpakigsabot nalang sa ubang heirs sa imong partner  kon mosugot ba sila nga anha kanimo ang house and lot, or pwede sab nga mo offer ka nga imong paliton ang house and lot nga gibilin sa imong partner. Thanks and God bless!

Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.