Gustong mangayo og sustento sa amahan sa mga bata

Dear Atty. Divine,

Duna koy tulo ka anak apan di mi kasal sa amahan sa  mga bata. Nagbuwag mi sa dihang buntis ko sa akong ikatulo nga anak kay wa na ko nakaagwanta sa iyang pagkahimabaye. Ang akong eldest nag-eskuyla na ug wa gyud magsuporta ang amahan  sa akong mga anak. Ako na siya gipangayoan og sustento apan wa gyud magpakabana so nagkalisud gyud ko karon kay wa koy stable nga trabaho. Unsay angayan nako nga buhaton aron ma-obligar siya sa pagsuporta sa mga bata? Daghang salamat. — Lorena

Dear Lorena,

Ang una nimong buhaton mao ang pagpadala og demand letter sa amahan sa mga bata labot sa ilang financial support. Mas maayo nga adto ka magpahimo og demand letter sa abogado. Kon di gani siya gihapon mohatag, lain nimong option mao ang pagpasaka kaniya og reklamo sa barangay diin siya nagpuyo. Kon di gihapon mo ma-settle sa barangay then modangop na gyud ka sa korte. Mamahimong kasong criminal ang imong ipasaka basi sa Anti- Violence Against Women and their Children ug pwede sab nga para lang sa Child Support ang imong i-file. Kon aduna na unyay mando sa korte then mapugos gyud siya sa paghatag og suporta sa mga bata matag buwan kay iya man kining obligasyon isip amahan sa mga bata. Thanks and God bless. —Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.